Шымкентте «Автокөлігіңді өрттен сақта!» атты рейд өтті

Шымкентте автокөліктердегі өрттерді азайту және алдын алу мақсатында рейд жүргізілді, деп хабарлайды ERNUR.KZ.

Шымкентте қалалық Төтенше жағдайлар бөлімінің, жол-патрульдік полиция қызметкерлері, «Nur Otan» партиясы жанындағы «Jas Otan» Жастар қанаты Шымкент қалалық филиалы жастарымен бірлесіп, Ташкент тас жолы бойында рейд жүргізілді.

Рейд барысында жол-патрульдік полиция қызметкерлерінің көмегімен жеңіл автокөліктер мен қоғамдық көліктер тоқтатылып, «Jas Otan» Жастар қанаты жастарымен үгіт-насихат жұмыстары жүргізілді. Жүргізушілермен жүргізілген профилактикалық әңгімелесуде ТЖ бөлімінің қызметкерлері автокөлікте өрт болған кездегі іс-әрекет тәртібін айтып жеткізді. Сондай-ақ, көлік құралдарындағы өрттердің негізгі себептерін түсіндіріп, автокөлік иелеріне автокөліктердегі өрт қауіпсіздік қағидалары туралы жадынама таратты.

Бұл іс-шараның мақсаты – жүргізушілерді мүмкіндігінше көбірек қамтып, оларға автокөліктегі өрттің қауіптілігін жеткізу. Айта кетейік, қазіргі таңда шығатын өрттің негізігі себептері – автокөлік құралдарындағы электр сымдарының қысқаша тұйықталуы және автокөліктің техникалық жағдайы екен.