Шымкентте қоғамдық көлік жол апатына ұшырады

Шымкентте қоғамдық көлік пен такси соқтығысып бес адам зардап шекті деп хабарлайды ERNUR.KZ тілшісі.

Шымкент қаласы, Қайнарбұлақ тұрғын үй алабы аумағында ВАЗ-2199 жеңіл автокөлігі мен автобус соқтығысып қалған. Куәгерлердің айтуынша, жеңіл көлік жүйткіп кеп қарсы бағытқа шығып 70-ші бағыттағы жолаушылар автобусын соққан. Көліктерге айтарлықтай залал келген. Оқиға орнында құзырлы органдар қызметкерлері жұмыс істеп жатыр.

Жол-көлік оқиғасынан бес адам зардап шеккен. Оқиға орнына жеткен жедел жәрдем қызметі бесеуін де Шымкент қалалық нөмірі бірінші ауруханаға жеткізген.

"Жол-көлік оқиғасынан зардап шеккен бес адамның төртеуіне алғашқы медициналық көмек көрсетіліп үйлеріне қайтарылды. Учаскелік дәрігерлердің бақылауында болады. Зардап шеккендердің біреуінің жағдайы ауыр болғандықтан жансақтау бөліміне жатқызылды,"-деп мәлімдеді Шымкент қалалық денсаулық сақтау басқармасының баспасөз қызметі.