Шымкентте көлік жүргізушінің кесірінен 600-ден астам үй газсыз қалды

30.12.2022 17:06

1 034

Автокөлік жүргізушісінен газ компаниясына келтірілген материалдық шығын сот тәртібімен өндірілетін болады.

Шымкентте жеңіл көлік жүргізушісінің кінәсінен 600-ден астам үй газсыз қалды, деп хабарлайды ERNUR.KZ polisia.kz-ке сілтеме жасап.

30 желтоқсанда таңғы сағат 05:31 шамасында Құрсай шағын ауданында Opel Vectra жүргізушісі тізгінді басқара алмай, жоғары қысымды газ құбырына соғылды. Жол-көлік оқиғасының салдарынан 612 жеке тұрғын үй мен бір өнеркәсіптік кәсіпорын газсыз қалды.

"Кінәліге қатысты полицейлер ҚР ӘҚБтК-нің 610-бабы (Көлік құралдары жүргізушілерінің жол жүру ережелерін бұзуы, көлік құралдарының немесе өзге де мүліктің бүлінуі) бойынша әкімшілік хаттама толтырды", - делінген жазбада.

Жинақталған материалдарды тәртіп сақшылары мамандандырылған сотқа жібереді. Автокөлік жүргізушісінен газ компаниясына келтірілген материалдық шығын сот тәртібімен өндірілетін болады.