Шымкентте «ҚҰСТАР ФЕСТИВАЛІ» қойылымы көрсетілді

Жасөспірімдерге арналған бұл спектакль өзекті әлеуметтік мәселелерді астарлы түрде көтеруімен ерекшеленеді. Қойылымда қоғамдағы әділетсіздік, теңсіздік, екіжүзділік және адам бойындағы түрлі мінез-құлықтар құстар бейнесі арқылы бейнеленген.

Аталмыш қойылымның режиссері Жавлон Сайитов адамзаттың ғасырлар бойы өзгермей келе жатқан кейбір келеңсіз қасиеттерін – байлыққа ұмтылу, өтірік пен қулық-сұмдыққа бейім болу, әлсізге әлімжеттік жасау – сахна тілімен шебер жеткізе білді.

Басты кейіпкерлер ретінде сахнада бүркіт, тоты, сауысқан, тауыс, әтеш және қарға сынды түрлі құстар бейнеленіп, олардың әрқайсысы адам бойындағы белгілі бір мінездің символына айналған. Мысалы, бүркіт – айбат пен үстемдікті, тоты – сұлулық пен әсемдікті, сауысқан – өсек пен әжуаға бейімділікті, ал қарға – ащы шындық пен дөрекілікке жақын мінезді білдіреді.

Қойылым арқылы көрерменге әділеттілік, адамгершілік және ішкі мәдениеттіліктің маңыздылығы жөнінде терең ой тасталады. Бұл әсіресе өскелең ұрпақ үшін үлкен тәрбиелік мәнге ие. Қоғамдағы өзекті мәселелерді көркем тілмен жеткізе отырып, спектакль жас көрермендердің сыни ойлауын, өмірге деген көзқарасын қалыптастыруға ықпал етеді.

«Құстар фестивалі» – Дулат Исабеков шығармашылығының уақыт сынынан өткен туындыларының бірі. Қойылым көтеріп отырған тақырыптар бүгінгі күні де өзектілігін жоймаған. Бұл – сахна өнері арқылы адамзат болмысына үңілудің бір үлгісі.