ОҚО-да «IT PARK» жас программистер мектебі ашылды

Шымкенттегі Жастар ресурстық орталығында «IT PARK» жас программистер мектебі ашылды. Жоба Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Жолдауы мен «Цифрлық Қазақстан» мемлкеттік бағдарламасы аясында жүзеге асырылуда,-деп хабарлайды ERNUR.KZ.

-Біздің зерттеу бойынша бүгінгі таңда өңірдегі жастардың ақпараттық технология саласына қызығушылығы артып келеді. Осы талантты жастардың басын бір арнаға тоғыстырып орталық ашсақ деген болатынбыз. Бұл «IT park»-тың басты мақсаты – облыс жастарының цифрлық сауатын арттыру. Одан бөлек, егер осы мектепті оқып бітірген жастар жобасын ұсынып жатса, біздің тарапымыздан қаржылай қолдау көрсетуге дайынбыз,-дейді жоба үйлестірушісі Азиз Есжанов.

Ақпараттық технологиялар саласындағы мамандар мен өзіне сенімді, талапшыл 14-29 жастағы 700-ге жуық жастар аталған мектепке оқуға өтініш білдірген. Алдағы уақытта жобаға қатысушыларды 4 кезең бойынша іріктеп, үздік 25 оқушыны қалдыратын болады. Бұл оқушылар 3 айлық арнайы курсты тегін оқиды. Курста модельдеу, сматрфондарға арналған қосымшаларды іске қосу, сайт ашу т.б сабақтар бойынша білімін жетілдірмек.

Жоба үйлестірушінің айтуынша, бүгінде 5 мобильді қосымша әзірленген. Олар жақын күндері смартфондарға арналған сатылым алаңына енетін болады. Жыл соңына дейін жалпы 10 жоба әзірлеу жоспарланған.