«ТАЗА ҚАЗАҚСТАН»: Созақтық ардагерлер тазалық акциясына атсалысты

Созақтық ардагерлер сенбілік тазалық акциясына белсене атсалысты, деп хабарлайды ERNUR.KZ.

«Таза Қазақстан» экологиялық акциясы аясында Созақ аудандық ардагерлер кеңесінің ұйымдастыруымен аудан орталығындағы «Даңқ» саябағы мен аудан аумағындағы балық ауылдық округтерде сенбілік жұмыстары ұйымдастырылды. Аталған шараға аудан әкімі Мұхит Тұрысбеков арнайы қатысып, аудан аумағын абаттандыруға өз үлестерін қосқан ардагерлерге алғысын жеткізді.

Аудандық ардагерлер кеңесінің төрағасы Қабылбек Еспенбетов тұрғындарды «Таза Қазақстан» экологиялық акциясын қолдауға шақырды.

«Тазалықты алдымен өзімізден бастауымыз қажет. Ауылымызды таза ұстау, оны жасыл желекке бөлеу – біздің басты міндетіміз. Осындай игі шаралар арқылы келешек ұрпақты тазалыққа тәрбиелейміз», деген ақсақал шараның маңыздылығына тоқталып өтті.

Саябақта өткен тазалық жұмыстарына 50-ге тарда ардагер қатысып, ауданның экологиялық жағдайын жақсартуға әрдайым ниетті екендерін жеткізді. Аумақты абаттандырды. Ұлы Отан соғысы кезінде қаза болған майдангерлер есімі жазылған белгітастарды тазалап, «Белгісіз жауынгер» ескерткішінің айналасын ретке келтірді. Тазалыққа қажетті 2 техника жұмылдырылып, шөптер мен қураған ағаштар оталды.