Түркістан облысының аудандары көркейіп жатыр

ERNUR.KZ. Түркістан облысындағы аудандар мен елді мекендер көркейіп жатыр, деп хабарлайды ERNUR.KZ Түлкібас ауданы әкімдігінің facebook-тағы ресми парақшасына сілтеме жасап.

Облыс аумағындағы аудандарда, оның ішіндегі елді мекендерде Елбасымыздың «Болашаққа бағдар: рухани жаңғыру» бағдарламасының «Туған жер» кіші бағдарламасы аясында біршама шаралар атқарылып жатыр.

Солардың бірі, Түлкібас поселкесіне кіре беріс жерге «Түлкібас менің жүрегімде» деген латын әрпінде белгі орнатылған және сол жерде орналасқан «Қазақстан Теміржолы» АҚ мекемесінің көлік тұрағының бойындағы көше қабырғаларына демеушілер тарапынан тарихи суреттерге түрлі бояулармен рең беріліп, заманауи стильде тарихи суреттер салынған.

Сонымен қатар, темір жол аспалы көпірдің заманауи тұрғыда келбетін келтіру мақсатында демеушілер тарапынан пианино үлгісінде бояу жұмыстары жүргізіліп, орталық көше бойына пилондар орнатылған. Пилондарда Елбасымыздың «Рухани жаңғыру» бағдарламалық мақаладағы бағыттары жазылған. Бұл пилондар түнгі уақытта жарықтандырылып тұратын көрінеді.

Айта кетейік, облыстық маңызы бар Н.Өзбеков көшесіне толығымен асфальт төселіп, жаяу жүргіншілер жолы халыққа пайдалануға берілген. Алдағы уақытта түнгі жарықтандыру жүргізілетін болады.