Фото:depositphotos.com
ERNUR.KZ. App Store-да VK қосымшалары, соның ішінде VK Музыка, VK Мессенджер, VK Видео және негізгі "ВКонтакте" қосымшасы қолжетімсіз болып қалды. Сондай-ақ Apple қосымшалар дүкенінен "Одноклассники", "Дзен" және "Почта Mail.ru" жойылды. Бұл туралы VK баспасөз қызметі хабарлады, деп жазады Tengri Life.
Қандай қосымшалар қолжетімсіз?
Компанияның мәліметінше, VK тобының қосымшаларын бұдан былай Apple құрылғыларына App Store арқылы жүктеуге немесе жаңартуға болмайды. Шектеулер бірнеше танымал сервистерге әсер етті: VK, VK Музыка, VK Мессенджер, VK Видео, "Одноклассники", "Дзен" және "Почта Mail.ru".
VK өкілдері қосымшалардың Apple тарапынан ешқандай алдын ала ескертусіз жойылғанын атап өтті.
VK компаниясы не дейді?
Компания өзінің санкциялар тізімінде жоқ екенін мәлімдеді. Компанияның пікірінше, Apple шешімі пайдаланушылардың сұранысқа ие цифрлық сервистерге қол жеткізуін шектейді.
"Apple ескертусіз VK қосымшаларын біржақты тәртіпте жойды. Apple өз әрекеттерімен ондаған миллион адам күнделікті пайдаланатын сұранысқа ие сервистерге: әлеуметтік желілерге, мессенджерлерге, видеоплатформаларға, электронды пошта мен білім беру өнімдеріне пайдаланушылардың қол жеткізуін шектеп отыр", - деп мәлімдеді VK.
Пайдаланушылар үшін не өзгереді?
Компания қосымшаларды жоюдың салдары хабарландырулар жүйесіне әсер етуі мүмкін екенін ескертті.
"Apple-дің әрекеттері пайдаланушылардың хабарламалар мен маңызды оқиғалар туралы push-хабарландыруларды алмауына әкеп соғады", - делінген VK хабарламасында.
Сонымен қатар компания iPhone және басқа да Apple құрылғыларына орнатылып қойған қосымшалар жұмысын жалғастыратынын баса айтты.
VK сондай-ақ пайдаланушылардың өз сервистеріне қол жеткізуін сақтап қалу үшін шаралар қабылдап жатқанын хабарлады.
VK қосымшалары қайда қолжетімді?
Android-смартфон иелері үшін VK сервистері шектеусіз жұмыс істеп тұр. Пайдаланушыларға жаңартулар, хабарландырулар және қосымшалардың өзге де функциялары қолжетімді.
Компания ақпаратынша, қосымшаларды Google Play, Huawei AppGallery, Samsung Store, Xiaomi Store арқылы, сондай-ақ тиісті өнімдердің ресми сайттарынан жүктеуге болады.
Осы айдың басында Max мессенджері де App Store арқылы жүктеуге қолжетімсіз болған еді.
Жарияланым шыққан кезде VK Apple және Android құрылғыларында сервистермен жұмыс істеудің қолжетімді тәсілдері туралы пайдаланушыларды ақпараттандыруды жалғастырып жатыр.
