30-31 шілде күндері шамамен 60 мың заңсыз мигрант Испанияның Солтүстік Африкадағы Сеута эксклавына кіруге әрекет жасады.
Фото: AP/Antonio Sempere
ERNUR.KZ. Марокко шекарашыларының күтпеген шегінуінен кейін ондаған мың мигрант Испанияның Сеута эксклавына лап қойды. Мадридте бұл оқиғаның артында саяси қысым болуы мүмкін деген күдік күшейіп отыр, дее жазады Stan.kz.
30-31 шілде күндері шамамен 60 мың заңсыз мигрант Испанияның Солтүстік Африкадағы Сеута эксклавына кіруге әрекет жасады. Олардың көбі шекарадан еш кедергісіз өтіп, Испания аумағына кіргеннен кейін полицияға тас лақтырып, дүкендерді тонаған.
Испания қауіпсіздік қызметтерінің мәліметінше, жаппай көші-қон басталар алдында Марокко полициясы әдейі шекарадан шегінген. Тек кешкі уақытта ғана шекарашылар көзден жас ағызатын газ бен суатқыштарды қолданып, адамдар легін тоқтатуға кіріскен.
Мадридте бұл жағдай үлкен алаңдаушылық туғызды. Ресми түрде Испания үкіметі Марокконы айыптамай, екі ел арасындағы "үлгілі ынтымақтастық" туралы айтып отыр. Алайда бейресми деңгейде оқиғаның себептері қызу талқыланып жатыр.
Сонымен қатар Испания Ішкі істер министрлігі жаппай мигранттар ағыны тоқтатылғанын мәлімдеді. Ведомствоның дерегінше, дағдарыс басталғалы елге заңсыз кіргендердің саны 50 мыңға жеткен, олардың 48 300-і өз еркімен Мароккоға қайтарылған. Испания билігінің мәліметінше, Сеутадағы оқиға кезінде ел аумағынан 57 мигранттың мәйіті табылған. Марокко жағында да қаза тапқандар болуы мүмкін екені айтылды. Осыдан кейін Испания теңіз және әуе шекараларындағы қауіпсіздік шараларын күшейтті.
Бірқатар мигранттар The New York Times басылымына Марокко полициясының оларды тоқтатпағанын, тіпті Сеутаға қарай бағыт көрсеткенін айтқан. 26 жастағы Юсеф Алауидің сөзінше, полицейлер: "Ана жаққа барыңдар, Испанияға өтіңдер" деп жол сілтеген.
Бұл оқиға Испания премьер-министрі Педро Санчестің Алжирге сапарынан бірнеше күн өткен соң болды. Сарапшылардың пікірінше, Испанияның Алжирмен жақындасуын Марокко жақтырмайды. Сондықтан кейбір бақылаушылар мигранттар ағынын Батыс Сахара төңірегіндегі көпжылдық саяси текетіреспен байланыстырып отыр.
Батыс Сахара – Солтүстік-Батыс Африкадағы даулы аумақ. Марокко оны өз жері деп санайды, ал Алжир тәуелсіздікті қолдайтын Полисарио майданын қолдайды. БҰҰ бұл аумақтың мәртебесі әлі анықталмағанын мәлімдейді.
Осыған ұқсас жағдай 2021 жылы да болған. Сол кезде де Марокко шекара бақылауын әлсіреткеннен кейін мыңдаған мигрант Сеутаға өткен. Кейін Испания Батыс Сахара мәселесінде Марокко ұсынған автономия жоспарын қолдаған соң ғана дағдарыс бәсеңдеген.
Дағдарыстың өршуіне Испания Жоғарғы сотының жуырдағы шешімі де әсер еткен болуы мүмкін. Сот Сеутаға жүзіп жеткен мигранттарды бірден Мароккоға қайтаруға болмайтынын, әрбір істі жеке қарау қажет екенін мәлімдеді.
Осыдан кейін әлеуметтік желілерде "Сеутаға жүзіп жеткен адамды депортациялау мүмкін емес" деген ақпарат кең тараған. Испания үкіметінің пікірінше, дәл осы қауесет мыңдаған адамның шекараға ағылуына түрткі болған болуы мүмкін.
