Түркияда қазақстандық офицерге арналған ескерткіш тақта ашылды

22.11.2025 14:27

Жиналғандар бітімгердің рухына бір минут үнсіздікпен құрмет көрсетті.

ERNUR.KZ. Түркияның әскери жоғары оқу орнында қазақстандық офицерге арналған ескерткіш тақта ашылды, деп жазады sputnik.kz.

Түркияның әскери жоғары оқу орнында Қазақстан қарулы күштерінің офицері, Ирактағы бітімгерлік миссияны орындау кезінде қаза тапқан капитан Қайрат Құдабаевқа арналған ескерткіш тақта ашылды. Оған офицердің жұбайы мен екі қызы қатысты. Жиналғандар бітімгердің рухына бір минут үнсіздікпен құрмет көрсетті.

Бұл шара Қазақстанның қорғаныс министрі Дәурен Қосановтың Түркияға ресми сапары барысында болды.

"Ескерткіш тақтаның дәл осы әскери оқу орнында ашылуы бекер емес. Қайрат Құдабаев осы институттың түлегі. Қазақстандық офицер жарылыс кезінде өз денесімен жарылған оқ-дәрілерді жауып, жолдастарын аман алып қалды. Ерлігі үшін ол I дәрежелі "Айбын" орденімен марапатталды", – деді қорғаныс министрі.

Сондай-ақ Дәурен Қосанов Анкарадағы Түркия құрлық әскерлері әскери институтында қазақстандық курсанттармен кездесті. Олардың оқу және тұрмыс жағдайларын көрген министр оқу үлгерімі мен өзекті мәселелерді талқылады.