2024 жылы ең төменгі жалақы мен зейнетақы қанша болады?

06.12.2023 10:09

1 027

Президент республикалық бюджет туралы заңға қол қойды.

ERNUR.KZ. Президент Қасым-Жомарт Тоқаев "2024-2026 жылдарға арналған республикалық бюджет туралы" заңға қол қойды, деп жазады sputnik.kz.

Заңға сәйкес 2024 жылдың 1 қаңтарынан бастап:

ең төменгі жалақы (ЕТЖ) – 85 000 теңге;

айлық есептік көрсеткіш (АЕК) – 3 692 теңге;

мемлекеттік базалық зейнетақы төлемінің ең төменгі мөлшері – 28 215 теңге;

зейнетақының ең төменгі мөлшері – 57 853 теңге;

базалық әлеуметтік төлемдердің мөлшерін есептеуге арналған ең төменгі күнкөріс минимумы 43407 теңге болып бекітілді.

Жасы бойынша зейнетақы төлемдеріне және еңбек еткен жылдары үшін зейнетақы төлемдеріне бөлінген қаражат осы аталған сомалардың 2024 жылғы 1 қаңтардан бастап 9%-ға ұлғаюын ескере отырып қарастырылған.

Сондай-ақ мемлекет басшысы "Қазақстан Республикасының Ұлттық қорынан 2024-2026 жылдарға арналған кепілдендірілген трансферт туралы" заңға қол қойды.

Бұған дейін заң жобасы қоғамдық талқылауда болды.

Сондай-ақ 2023 жылдан 2027 жылға дейін ең төменгі базалық зейнетақының мөлшерін ең төменгі күнкөріс деңгейінің 54-тен 70 процентіне, ал ең жоғары мөлшерін 100-ден 120 процентке дейін кезең-кезеңімен ұлғайтылатыны бұған дейін хабарланды.

Биылғы жылдың басында базалық зейнетақының ең төменгі мөлшері 54%-дан 60%-ға дейін өсті.

Бес жыл ішінде базалық зейнетақының мөлшері орта есеппен 50%-ға дейін өседі. Бұл Қазақстандағы барлық зейнеткерді (қазіргі уақытта 2,3 миллион адам) қамтиды.

Сонымен қатар базалық зейнетақының мөлшері де күнкөріс минимумының өсуіне қарай жыл сайын ұлғайтылады.

Сондай-ақ 2023 жылдың 1 қаңтарынан бастап зейнетке шығатын азаматтар үшін ынтымақты зейнетақыны есептеу үшін пайдаланылатын ең жоғары табыс 46-дан 55 АЕК-ке дейін ұлғайтылды.

Бұл ретте белгіленген ынтымақты зейнетақы мөлшері жыл сайын инфляция деңгейінен 2%-ға өсіп жатыр.