Абай облысы 100 пайыз ауызсумен қамтылады

Еліміздегі ең өзекті мәселелердің бірі – тұрғындарды толықтай сапалы ауызсумен қамту мәселесі. Соңғы жылдары аталған проблема біртіндеп шешімін тауып келе жатыр десек қателеспейміз. Сәйкесінше, ауызсу мәселесі жуырда толықтай шешілетін өңірлердің бірі жаңадан құрылған Абай облысы болып отыр.

Өткен жылы өңірдегі ауызсумен қамтамасыз ету көрсеткіші 93 пайызға жуық болса, жыл бойы жиырмадан астам жоба жүзеге асырылып, нәтиже 96 пайыздан асқан. Соның ішінде облыс орталығында жеті бірдей жоба қолға алынып, семейліктерді сумен қамту көрсеткіші 95 пайызға жуықтапты. Сонымен қатар, былтыр 2025 жылы сумен қамту көрсеткішін жақсарту үшін құны 27 миллиард теңгеден асатын 24 жобаны іске асыруға өтініш берілген. Тағы бір айта кетерлігі, 2024 жылдың соңына дейін «Восход» және «Водный» елдімекендері орталық су жүйесіне қосылды. Осы уақытқа дейін аталған кенттерде орталықтандырылған желі мүлдем болмаған. 2023 жылы құрылысы басталған жоба аясында 40 шақырымға жуық құбыр тартылып, жиырмадан аса өртке қарсы су көздері орнатылған.

Ал, биыл Абай өңірі толықтай ауызсумен қамтылады деп жоспарланып отыр. Бұл мақсатқа қол жеткізу үшін су құбырларын жүргізу және ескі желілерді жаңарту жұмыстары қарқынды түрде іске асырылып келеді. Атап айтқанда, сумен қамту саласы бойынша облыс аумағында жиырма алты жаңа жоба жүзеге асырылып жатыр. Оның біршамасы 2024 жылдан өтпелі болған. Бұл бағыттағы жұмыстарға ел қазынасынан 2 миллиард 700 миллион теңге бөлінген және қосымша 4 миллиард 400 миллион теңге қажеттілігі бар екен. Облыс әкімдігінің өкілдері қосымша қаржыға өтініш беріліп қойғанын баяндады.

Оған қоса, бүгінгі таңда өңірде ескірген су желілерін жаңғырту бойынша он төрт жоба іске асырылып келеді және тағы жиырмадан аса жобаның құжаттары әзірленген. Соның ішінде төрт жобаның жұмысына бюджеттен 8 миллиард 600 миллион теңге бөлінсе, өзге де жобаларға 23 миллиард теңге көлемінде қажеттілік бар.

Біршама уақыт бұрын Абай облысының әкімі ауысып, бұл лауазымға ел президентінің кеңесшісі әрі баспасөз хатшысы қызметін атқарған Берік Уәли тағайындалған болатын. Қызметке келе сала өңірдің тыныс-тіршілігімен танысқан әкім облыс көлеміндегі барлық сумен қамту нысандары 2025 жылдың соңына дейін іске қосылуы қажет екендігін айтты. Атап өтер болсақ, биылғы жылға жоспарланған жиырма алты жоба Сеймей қаласы мен Үржар, Бесқарағай, Көкпекті, Жарма сынды бірнеше ауданның елдімекендерінде іске асырылып жатыр.

Облыс әкімі өз сөзінде ел президентінің тапсырмасына сәйкес іске асырылып жатқан жұмыстар уақытылы әрі сапалы орындалуын талап етіп, қала мен аудан әкімдеріне нақты тапсырмалар жүктеді. Міндетін дұрыс атқармаған мердігерлермен де тиісті жұмыстар жүргізілетін болады.

Жалпы, соңғы жылдары Мемлекет басшысы Қасым-Жомарт Тоқаевтың тапсырмасымен еліміздің тұрғындарын сапалы инфрақұрылыммен қамту жұмыстары қарқынды жүргізіліп жатыр. Соның ішінде ел тұрғындарын таза ауызсуен қамтамасыз ету және ескірген желілерді жаңарту жұмыстарын ерекше атап өтуге болады. Мәселен, соңғы алты жыл ішінде қала халқын сапалы сумен қамтамасыз ету көрсеткіші 2,2 пайызға көтеріліп, 99,4 пайызға жеткен. Ал ауыл халқын қамту деңгейі 11,4 пайызға көтеріліп, 97,8 пайызды құрап отыр. Нәтижесінде еліміздегі 6256 ауылдық елдімекеннің 5523-і сапалы ресурсқа қол жеткізген. Ал қалғаны биыл ауызсу желісіне қосылатын болады. Тағы бір айта кетерлігі, Президент тапсырмасы аясында елордалықтарды сапалы сумен қамтуға мүмкіндік беретін станция іске қосылды. Одан бөлек тағы бір ауқымды су құбыры жүргізіліп жатыр. Осылайша астаналықтар да бііраз жылға ауызсу мәселесін ұмытатын болады.

Б.Мейірханұлы,

ERNUR.KZ