Елімізде бір жылда көлік саны 300 мыңға ұлғайды.
ERNUR.KZ. Өтіп бара жатқан көліктің транзиті 3 млн бірлікке дейін артты. Бұл ретте инфрақұрылым әлсіз қарқынмен дамуда. Еліміздегі әрбір төртінші жол-көлік оқиғасы балалардың қатысуымен болады. Жыл басынан бері балалардың қатысуымен 1 мыңнан астам жол-көлік оқиғасы тіркелді, салдарынан 17 адам қаза болып, 1,5 мыңға жуық кәмелетке толмаған бала жарақат алды. Бұл жайында ҚР ІІМ Әкімшілік полиция комитетінің төрағасы Қайсар Сұлтанбаев ОКҚ алаңында өткен баспасөз конференциясында хабарлады.
Оның айтуынша, ағымдағы жылдың 20-23 мамыр аралығында балалардың жол-көлік жарақаттануының алдын алу мақсатында бүкіл ел бойынша «Назар аударыңыз – балалар!» жедел-профилактикалық іс-шарасы өткізіледі. Оның шеңберінде мектептер маңындағы жолдар мен аумақтарды тексеру, жол жүрісі қауіпсіздігі тақырыбында профилактикалық сабақтар мен дәрістер өткізу жоспарланған.
«Балалардың жолдағы қауіпсіздігі көп жағдайда ата-аналарға байланысты екенін атап өту қажет, өйткені балалар ересектердің мінез-құлқын қайталайды. Жаяу жүргінші, велосипедші немесе самокат жүргізуші ретінде балаларға жолдағы қауіпсіздік ережелерін түсіндіру қажет деп есептейміз. Жол жүрісі қағидаларын сақтаңыз және балаларға абай болыңыздар!», – деп ескертті Қ.Сұлтанбаев.
Оның пайымдауынша, еліміздің жолдарында тәртіп орнату – барлық мүдделі орган мен жол қозғалысына қатысушылардың міндеті. Тек полиция күштері мен заңнаманы қатаңдату арқылы жол-көлік оқиғалары санын және салдардың ауырлығын төмендету мүмкін емес. Ал, жол қауіпсіздігін қамтамасыз етудегі оң нәтижелерге бірлесіп жұмыс істеу арқылы қол жеткізуге болады.
