​Ақтөбеде қатты желдің салдарынан бірнеше бағыттағы жол жабылды

Ақтөбе облыстық ПД және облыстық ТЖД өңірдегі бірнеше жолдың уақытша жабылғанын хабарлады. Қазіргі кезде жел күшейіп, далада боран соғып тұр. Салдарынан Ақтөбе – Астрахань автожолының Ақтөбе қаласынан Қандыағаш қаласына дейінгі аралық жүк және қоғамдық көліктер үшін жабық. Ал Қандыағаштан Атырау облысының шекарасына дейінгі аумақта көліктің барлық түрі жүре алмайды. Сонымен бірге Самара – Шымкент тасжолының Ақтөбе қаласынан Қарабұтақ ауылына дейінгі аралық қауіпті саналып, жүк көлігі мен автобустарының қозғалысы шектелді. Сонымен бірге Ақтөбе – Болғарка автожолы уақытша жабылды.

Ақтөбе облыстық ТЖД баспасөз қызметінің хабарлауынша, егер күн райы өзгерсе жолды түнде қайта ашуы мүмкін. Қазіргі кезде Ақтөбедегі солтүстік айналма жол, Покровка-Темір-Ембі, Ақтөбе-Болгарка-Шұбарқұдық және Қандыағаш қаласынан Шалқар қаласына дейінгі аралық толық жабылды. Жергілікті маңызы бар Дөң-Бадамша-Ақтөбе-Орск тасжолының Хромтау қаласынан Ақтөбе-Орск тасжолына дейінгі аралыққа шектеу қойылды. Ал Ақтөбе қалалық әкімдігі орталықтағы ең үлкен туды уақытша түсіруге шешім қабылдаған.