Ақтөбелік тыл еңбеккері 110 жасқа толды

24.08.2025 16:09

166

Жәкібай Бисенғалиева әлі де тың, құттықтап келген жандарға ақ батасын берді.

ERNUR.KZ. Ақтөбеде тыл еңбеккері 110 жасқа толды. Қарт ананы мерейлі жасымен облыс әкімі Асхат Шахаров құттықтап барды, деп жазады sputnik.kz.

Ақтөбелік тыл еңбеккері 110 жасқа толды

Жәкібай Бисенғалиева 1915 жылы 24 тамызда дүниеге келген. Қария соғыс жылдарынан бастап еңбекке ерте араласқан. Ол Новороссийск ауданы ұжымшарында астық таразылап, тракторшы, кітапханашы және сауыншы болып жұмыс істеген.

Жұбайы Ғабит Бисенғалиев Ұлы Отан соғысынан бірінші топтағы мүгедек болып оралып, 1993 жылы дүниеден озған. Ерлі-зайыптылар үш бала тәрбиелеп өсірген.

Қарт ана қазір бейнетінің зейнетін көріп, ұл-келін, немере-шөберелерімен бірге бақытты ғұмыр кешіп отыр. Ол 3 немере мен 7 шөберенің аяулы әжесі.

Өңір басшысы екі ғасыр куәсі болған қарт анаға алғыс білдірді.

"Сіздің ғұмыр жолыңыз – бәріміз үшін үлкен өнеге. Ұлы Отан соғысы жылдарында тылда аянбай тер төгіп, елдің даму жолында адал еңбегіңізді сіңірдіңіз. Осындай қажырлы еңбегіңіздің арқасында нағыз адал азамат ұғымының жарқын үлгісін көрсете білдіңіз. Ақтөбе облысының жұртшылығы атынан Сізге зор денсаулық және бақ-береке тілеймін", - деді Асхат Шахаров.

Жәкібай әже 110 жасқа келсе де әлі де тың. Әңгімесін айтып, құттықтап келген баршаға ақ батасын берді.