Өртті сөндіру барысында 3 оттегі және 4 газ баллоны шығарылды.
ERNUR.KZ. Алматының Алмалы ауданында өрт сөндірушілер отқа оранған қоймадағы жарылыстың алдын алып, кәсіпкерлердің көршілес және жапсарлас салынған ғимараттарға өрттің таралуына жол бермеді, деп жазады azattyq-ruhy.kz.
Қалалық ТЖД баспасөз қызметі мәлім еткендей, 14 қаңтарда 20 сағат 25 минутта Алматы қаласы ТЖД күштері мен құралдары Алмалы ауданына қарасты Әуезов к-сі, 2/8а мекенжайына жіберілген.
«Алғашқы өрт сөндіру есептері өрт орнына 6 минуттан кейін келген уақытта құрылыс материалдары мен лак-бояу өнімдері орналасқан қойманың 500 шаршы метр аумағы ашық жалынмен жанып жатқанын анықтады», - делінген ТЖД хабарламасында.
Өрттің көршілес орналасқан қоймаларға таралу қаупі туындады әрі қойма жайлары тез жанғыш бұйымдарға (битум, лак-бояу) лық толы болғандықтан, өртті сөндіру қиындай түскен.
Өрт орнында штаб жұмысы ұйымдастырылып, үш өрт сөндіру учаскесі құрылып, негізгі басым міндеттер айқындалды.
«Өртті сөндіру барысында қауіпсіз жерге 3 оттегі және 4 газ баллоны эвакуацияланды. Қабылданған шаралардың арқасында өрт сағат 22.34-те оқшауланып, 22.50-де толығымен жойылып, көршілес орналасқан қоймаларға өрттің таралуына жол берілмеді, нәтижесінде кәсіпкерлердің 5 мың м2 ТМҚ сақтау қоймалары аман қалды», - делінген хабарламада.
Өртті жоюға 21 бірлік техника, 100-ден астам адам жұмылдырылды
Қазіргі кезде өрттің шығу себептері анықталып жатыр.
