​Алматыдағы балалар үйі Қонаев қаласына көшіріледі

0
232

Осыған байланысты, балалар үйінің тәрбиеленушілері әлеуметтік желі арқылы видеоүндеу жариялады.


​Алматыдағы балалар үйі Қонаев қаласына көшіріледі

Фото: Алматы облысы әкімдігі

ERNUR.KZ. Алматы облысының №1 балалар үйінің тәрбиеленушілері ғимараттың Алматыдан Қонаевқа көшірілетініне наразы, деп жазады inform.kz.

Осыған байланысты, балалар үйінің тәрбиеленушілері әлеуметтік желі арқылы видеоүндеу жариялады.

– Балалар үйін көшіргісі келеді, ағаштарымызды кесіп, аумақты қиратып жатыр. Бұл жерде өмір сүру мүмкін емес болып барады. Бізді Қонаевқа көшіргісі келеді. Біз бұл жерді тастап кеткіміз келмейді. Өтініп сұраймын, көмектесіңіздерші, - делінген видеоүндеуде.

Аталған жағдайға қатысты Алматы облысының білім басқармасы мәлімдеме жасады.

Айтуларынша, 3 наурызда Алматы облыстық №1 балалар үйінің тәрбиеленушілері Қонаев қаласына барып, Алматы облысының әкімімен кездесіп, жаңа ғимараттың құрылысымен танысады.

– Балалар үйі мен оның тәрбиеленушілеріне қатысты барлық мәселе біздің бақылауымызда. Жаңа ғимаратты қажетті жабдықтармен, көлікпен және мектеп құралдарымен қамтамасыз ету ғана емес, балалардың қауіпсіздігін сақтай отырып, қолайлы жағдай жасау да маңызды, — деді Алматы облыстық білім басқармасының басшысы Салтанат Беспаева.
Сондай-ақ, басқарма әлеуметтік желілерде тараған жер учаскесінің аффилиирленген тұлғаларға сатылуы туралы қауесеттерді жоққа шығарды.

Жаңа кешен 240 орынға есептелген және аумағы 4000 шаршы метр. Құрылыс 1963 жылы салынған ескі ғимараттың апатты жағдайына байланысты жүргізіліп жатыр. Жаңа мекеме құрамында кәмелетке толмағандарды бейімдеу орталығы да жұмыс істейді. Ғимарат 900 орындық мектептің жанында орналасады. Балалардың қатынауы үшін 14 орындық автобус бөлінді. Алматыға дейінгі қашықтық – 65 шақырым.

Бұдан бөлек, тәрбиеленушілер 21 наурызда Қонаев қаласында өтетін Наурыз мейрамына шақырылды.