Алматыдағы жер сілкінісі: зардап шеккендер саны артты

Алматыда жер сілкінісінен зардап шеккендер саны артты. Қалалық денсаулық сақтау басқармасы зардап шеккендерге көмек туралы айтты, деп хабарлайды ERNUR.KZ.

23 қаңтарда сағат 17:00-дағы жағдай бойынша Алматы ауруханаларына 67 адам медициналық көмекке жүгінген.

"Оның 55-сі ересек, 12-сі бала. Сегіз адам ауруханаға жатқызылды (үш ересек және 5 бала), қалған науқастар барлық қажетті тексеруден кейін амбулаторлық емдеуге жіберілді. Үш ересек науқас Қалалық жедел шұғыл көмек көрсету ауруханасында жатыр. Науқастардың бірі отадан кейін жансақтау бөлімінде, жағдайы ауыр деп бағаланып отыр. Екі науқас травматология және ортопедия бөлімшесінде жатыр, жағдайы орташа ауыр. Балалар жедел медициналық жәрдем орталығында төрт бала: 6 және 7 айлық, 7 және 16 жастағы балалар медициналық көмек алып жатыр", - делінген хабарламада.

"Сәбилерге келетін болсақ, бір сәби анасының құшағынан, екіншісі бесіктен құлаған. Барлық баланың жағдайы орташа тұрақты деп бағаланады. Олар нейрохирургия және травматология бөлімшесінде ем қабылдап жатыр. Хирургиялық ота жасалмады, емі консервативті болды. ЖРВИ диагнозы қойылған 17 жастағы бір бала Қалалық балалар жұқпалы аурулар ауруханасында ем қабылдап жатыр", - делінген хабарламада.

Еске салайық, 23 қаңтарға қараған түні алматылықтар қатты жер сілкінісін сезді. Арада 49 минуттай уақыт өткенде алматылықтар тағы бір жер сілкінісін сезді. Бірақ ол әлсіз болды.