Шығармашылық салада жұмыс істейтін 22 жастағы жігіт патронды салынып жатқан LRT нысанының жанынан тауып алып, рюкзагіне салып қойған.
Иллюсрациялық фото:depositphotos.com
ERNUR.KZ. Бір дана патронды сақтағаны және тасымалдағаны үшін сотталған Астана тұрғыны қылмыстық істің тоқтатылуына қол жеткізді, деп жазады tengrinews.kz.
Не болды?
Іс материалдарына сәйкес, шығармашылық салада жұмыс істейтін 22 жастағы жігіт патронды салынып жатқан LRT нысанының жанынан тауып алып, рюкзагіне салып қойған.
Оның айтуынша, ол тауып алған затты түсірілімге қажетті реквизит ретінде қабылдаған. Кейінірек ер адам патрон туралы ұмытып кеткен.
Бір жылдан соң Алматыға ұшу үшін әуежайға келген ол ұшу алдындағы тексерістен өткен. Тексеру кезінде патрон рюкзактің қалтасынан табылды.
Патрон үшін бостандығын шектеу
Бірінші сатыдағы сот астаналықты оқ-дәріні заңсыз иемденгені, сақтағаны және тасымалдағаны үшін кінәлі деп танып, оған бір жылға бостандығын шектеу жазасын кесті.
Сонымен қатар тергеу барысында жігіттің патронды мақсатты түрде пайдалануды, оны басқа адамдарға беруді немесе сатуды көздегені анықталған жоқ. Одан қару да табылған жоқ.
Кассациялық сот қандай шешім шығарды?
Істі қарау барысында кассациялық сот Қылмыстық кодекстің 10-бабына сәйкес, құрамында қылмыстық құқық бұзушылық белгілері болғанымен, елеусіздігіне байланысты қоғамға қауіп төндірмейтін іс-әрекет қылмыс деп танылмайтынын атап өтті.
Сот сөздің тек бір патрон туралы болғанын, айналадағылар үшін ешқандай салдар туындамағанын және іс мән-жайлары табылған затты қылмыстық мақсатта пайдалану ниетін білдірмейтінін ескерді.
"Кассациялық сот іс-әрекеттің елеусіздігіне байланысты қылмыстық құқық бұзушылық құрамының болмауына орай қылмыстық істі тоқтатты. Бас прокуратура кассациялық соттың ұстанымымен келісті", - делінген хабарламада.
