Беті бері қарады: Үржардағы трагедияда ауыр жарақат алған балаларға қатысты қуанышты хабар тарады

ERNUR.KZ. Денсаулық сақтау министрі Ақмарал Әлназарова Үржарда адам шошырлық оқиғада ауыр жарақат алған екі баланың жағдайына қатысты қуанышты хабарды жариялады, деп жазады azattyq-ruhy.kz.

Министр Астанаға жеткізілген екі бүлдіршіннің жағдайы туралы нақты мәлімет беріп өтті.

«Медицина қызметкерлері командасының жеделдігі мен жоғары біліктілігінің арқасында Абай облысының Үржар ауданындағы жол-көлік оқиғасынан кейін Астана қаласының №2 көпбейінді балалар ауруханасына жатқызылған екі баланың жағдайы жақсарды.
Көптеген ауыр жарақаттармен келген қыздың жағдайы тұрақтандырылды, оған сәтті операция жасалды және қазір оның өміріне ешқандай қауіп төнбейді», – дейді министр.

Ол сөзін жалғай отырып, екінші пациентке, яғни жеті жасар балаға бүгін сүйектерін бекіту үшін арнайы металл стержендерді пайдаланып, жіліншігіне операция жасалатыны туралы ерекше айтып өтті.

«Мұндай заманауи әдіс араласудан болатын жарақаттанушылықты, асқыну қаупін азайтуға және қалпына келтіру процесін жеделдетуге мүмкіндік береді.
Оқиғадан кейінгі алғашқы сағаттардан бастап медициналық бригадалар балаларға шұғыл және жоспарлы көмектің толық көлемін қамтамасыз етті, бұл олардың денсаулығы мен өмірін сақтап қалуға мүмкіндік берді.
Балалардың тезірек сауығып кетулерін тілеймін! Ал біздің дәрігерлерге олардың қайсарлығы, біліктілігі мен адалдығы үшін шын жүректен алғысымды білдіремін», – дейді Ақмарал Әлназарова.

Айта кетейік, Үржарда көлік қағып кеткен үш бала қаза тауып, тағы үшеуі – ауыр халде болды. Қайғылы жол апатынан зардап шеккен екі бүлдіршін қазір Астанадағы №2 көпсалалы қалалық балалар ауруханасына жеткізілді.

Жақында денсаулық сақтау министрі Ақмарал Әлназарова ауруханаға арнайы барып, кішкентай пациенттердің хәл-жағдайын білді. Абай облысында көлік қағып, ауыр жараланған балаларды санавиацияның арнайы бортымен Астанаға жеткізді. Елордалық дәрігерлер науқастардың жағдайы туралы айтты. Абай облысы Үржар ауданынан жол-көлік оқиғасынан зардап шеккен екі баланы Астанаға жеткізу үшін Ұлттық шұғыл медицинаны үйлестіру орталығының (ҰШМҮО) санитарлық авиация борты ұшып шықты.