Дәптерін таза ұстамаған: қызын пышақтаған әйелге қатысты сот үкімі шықты

11 жастағы қызының үй тапсырмасын тексерген анасы оқушының өз дәптерін ұқыпты, таза ұстамағанын көрген. Ашуға булыққан ол ас үй пышағын жеткіншектің екі жамбасына сұғып алған. Қылмыстық істі облыстық кәмелетке толмағандар істері жөніндегі мамандандырылған ауданаралық соты Қылмыстық Кодекстің 106-бабының 2-бөлігі "Денсаулыққа қасақана ауыр зиян келтіру" бойынша қарады.

Сотталушы кінәсін толық мойындап, тіпті тағылған айыпқа қарсы дауласпаған. Алайда қыз бен оның өкілі соттан әйелді бас бостандығынан айырмауды сұраған.

Мұндай қылмыс бойынша айыпталған адамның заң бойынша мүлкі тәркіленеді немесе 6 жылдан 10 жылға дейін бас бостандығынан айырылады. Сотталушы қызына істеген қылығына өкінетіндігін айтқан. Алайда өз баласына қастандық жасағандықтан, оның кәмелетке толмаған баласының бары сотта жағдайды жеңілдететін жайт болып есептелмеді.

Сот үкімімен сотталушы 6 жылға бас бостандығынан айырылды. Ол жазасын орташа қауіпсіздіктегі қылмыстық-атқару жүйесінің мекемесінде өтеді. Үкім заңды күшіне енген жоқ.