Денсаулық сақтау министрі сүйек кемігінің доноры атанды

ERNUR.KZ. Министр бұл туралы Instagram-дағы парақшасында мәлімдеп, қан дертіне шалдыққан науқастар үшін донорлықтың маңыздылығын атап өтті, деп жазады azattyq-ruhy.kz.

«Олардың көпшілігі үшін жалғыз үміт – сүйек кемігін трансплантациялау. Алайда, туыс емес донор мен реципиент арасындағы үйлесімділік ықтималдығы өте төмен – 10 000 жағдайдың тек біреуінде ғана сәйкес келеді. Сондықтан донорлар тізілімін кеңейту өте маңызды», – деді ол.

Министрдің айтуынша, бүгінде Қазақстандағы Гемопоэтикалық дің жасушалары донорларының ұлттық тізілімінде 12 742 адам бар. Жыл сайын олардың саны артып келеді, алайда науқастардың генетикалық ерекшеліктеріне сай келетін донор табу үшін тізімді одан әрі кеңейту қажет.

Әлназарова Дүниежүзілік балалар обырына қарсы күрес күні қарсаңында министрлік «Әрбір қан тамшысындағы өмір» акциясын бастағанын хабарлады. Бұл бастама сүйек кемігі донорлығына және онкогематологиялық аурулары бар пациенттерге қоғам назарын аударуды көздейді.

Қазіргі таңда Қазақстанда қан обырымен ауыратын 8000-нан астам пациент есепте тұр. Жыл сайын шамамен 1500 жаңа жағдай анықталады, оның 600-і – балалар.