1 мамырдағы көрсеткіш бойынша ҚДКБҚ арнайы резервінде қатысушы банктердің жарналарының үлесі 377,1 млрд теңгеге жетті.
Қазақстанның депозиттерге кепілдік беру қорының арнайы резервінде жинақталған қаражаттың көлемі жыл басынан бері 1,6%-ға ұлғайып, шамамен 864 млрд теңге болды. Өткен жылдың сәйкес кезеңімен салыстырғанда 6,6% өскен. Бұл туралы ҚДКБҚ Әдіснама және талдау басқармасы басшысының орынбасары Рузалия Гильмудинова мәлімдеді, деп хабарлайды ERNUR.KZ.
1 мамырдағы көрсеткіш бойынша ҚДКБҚ арнайы резервінде қатысушы банктердің жарналарының үлесі 377,1 млрд теңгеге жетті. Қордың жарғылық капиталының 70%-ын қосқанда, арнайы резервтің жиынтық көлемі тұрғындар депозиттерінің 6,6%-ына тең.
«Қазіргі уақытта арнайы резервтің көлемі заңнамада белгіленген 5%-дық деңгейден жоғары және салымшылардың шоттарының 99,8%-ын толық көлемде қамти алады. Егер шет мемлекеттердің депозиттерді сақтандыру қорларындағы қаражат деңгейімен салыстырар болсақ, Қордың арнайы резервінің көлемі жеткілікті деңгейде және әлемдік практикаға сәйкес келеді», - деді Рузалия Гильмудинова.
Қордың арнайы резервінің қаражаты депозиттер бойынша кепілдік берілген өтемді төлеуге арналған.
«Егер қатысушы банк барлық банк операцияларын жүргізу лицензиясынан айырылар болса, оның салымшыларына кепілді өтем осы арнайы резерв есебінен төленеді. Қазіргі уақытта арнайы резерв 20 қатысушы банктің жарналары есебінен қалыптасады», - деді Қор талдаушысы.
Банктердің жарналарынан басқа, арнайы резервті қалыптастырудың негізгі көздерінің бірі – инвестициялық табыс. Ол Қордың арнайы резерві мен меншікті активтерін инвестициялаудан түседі.
Кепілдік берілген өтемді қамтамасыз ету үшін қосымша ретінде Қордың жарғылық капиталының 70%-ға дейінгі мөлшері пайдаланылуы мүмкін.
«Осылайша, қалыптасқан резерв Қорға ислам банктерін қоспағанда, Қазақстанның депозиттерге кепілдік беру жүйесіне (ДКЖ) қатысушы банктердің салымшыларының депозиттерін кепілдендіруге мүмкіндік береді. Салымшылар ДКЖ қатысушы банктердің тізімімен Қор сайтында толығырақ таныса алады. Қор қаражатының тұрақты өсімі ДКЖ сенімділігін растай түседі», - деді Рузалия Гильмудинова.
Бұдан басқа, ҚР заңнамасында резервтік қаржыландыру бойынша қатысушы банктердің қосымша жарналары секілді көмекші шаралар қарастырылған.
