Қазақстанның аймақтық өндірістегі үлесі 50%-дан асты.
https://allchinareview.com/more-than-scale-the-sou...
ERNUR.KZ. Халықаралық бұқаралық ақпарат құралдарында жарияланған мәліметтерге сүйенсек, 2025 жылдың қорытындысы бойынша Қазақстанның ЖІӨ-сі $306 млрд-қа жетті. Орталық Азия экономикасының жалпы көлемінің 53,7%-ы Қазақстанға тиесілі.
Жарияланымдардан байқалатындай, бүгінгі таңда Қазақстан аймақтың экономикалық өзегін құрап отыр. Ұлттық экономиканың ауқымы $147,1 млрд ЖІӨ көрсеткішімен екінші орында тұрған Өзбекстаннан екі еседен астам үлкен. Түрікменстанның экономикасы $77,4 млрд, Қырғызстандікі – $21,6 млрд, ал Тәжікстандікі – $17,5 млрд деп бағаланды.
Жан басына шаққандағы айырмашылық әсіресе айқын байқалады. Қазақстанда адам басына шаққандағы ЖІӨ шамамен $15 мыңға жетті. Түрікменстанда бұл көрсеткіш $11,6 мыңды, Өзбекстанда – $3,8 мыңды, Қырғызстанда – $3 мыңды, ал Тәжікстанда – $1,7 мыңды құрады. Мұндай алшақтық экономика өнімділігінің жоғары екендігін және жасалатын қосылған құн көлемінің едәуір үлкендігін көрсетеді.
Айта кетерлігі, елдің экономикалық салмағы тек шикізат секторымен ғана айқындалмайды. Жалпы қосылған құнның 20%-ға жуығын сауда-саттық құраса, шамамен 13%-ы өңдеуші өнеркәсіпке, ал 11,9%-ы тау-кен өндіру секторына тиесілі. Президент Қасым-Жомарт Тоқаевтың экономикалық саясаты өңдеуші өнеркәсіпті, цифрлық салаларды, логистиканы, қаржылық қызметтерді және инновациялық бағыттарды одан әрі дамытуды көздейді.
Жылжымайтын мүлік нарығы да айтарлықтай үлеске ие. Бұл көрсеткіш бойынша да Қазақстан көршілес мемлекеттерді басып озады. Мақалада бұл жағдай ішкі нарықтың мейлінше дамыған әрі құрылымдық тұрғыдан жетілгендігінің белгісі ретінде қарастырылады.
Халықаралық валюта қорының болжамы бойынша, 2026 жылы Қазақстан экономикасының көлемі $360,4 млрд-қа жетіп, елімізге әлемдегі 49-шы орынға табан тіреуге мүмкіндік береді. Қордың бағалауынша, Өзбекстан 61-ші орынға жайғасса, Түрікменстан, Қырғызстан және Тәжікстан әлемдік рейтингте одан төмен орындарды иеленеді.
Өңдеуші өнеркәсіптің, логистиканың, цифрлық сервистер мен қаржы секторының кеңеюі Қазақстанға өсу көздерін әртараптандыруға және экономиканың сыртқы ауытқуларға төзімділігін арттыруға септігін тигізеді.
