"Әлеуметтік студенттік кредит" жобасы іске асырылып жатыр.
ERNUR.KZ. ҚР Білім және ғылым министрі Ерлан Сағадиев волонтер-студенттерге шәкіртақының қалай төленетінін айтып берді, деп жазады ҚазАқпарат.
Министр 2019 жылдың Жастар жылы болып жарияланғанын еске салды және "Әлеуметтік студенттік кредит" жобасы іске асырылатынын жеткізді.
"Жалпы идея ретінде жоба дайын. Қазіргі уақытта оны жоғары оқу орындарымен бірге талқылап жатырмыз. Аталған жоба аясында студенттер волонтерлік қызметке тартылады. Қысқаша айтсақ, студенттерге келісілген пәндер бойынша екі түрлі ваучер ұсынылады: 2 және 5 кредиттік ваучер. Бұл - 20 немесе 50 сағаттық волонтерлік қызмет және сағатына 1 000 теңгеден төленеді. Үш жылда жобаға қатысатын студенттер санын 20 мыңғажеткізуді жоспарлап отырмыз", - деді Ерлан Сағадиев.
Министрліктің хабарлауынша, әлеуметтік студенттік ваучер төмендегі бағыттар бойынша әлеуметтік пайдалы қызметпен айналысатын студенттерге беріледі:
- инклюзивті білім беру;
- қазақ тілі, ағылшын тілі, компьютерлік сауаттылықтан қосымша сабақ беру;
- девианттық мінез-құлқы бар кәмелетке толмаған балалармен жұмыс істеу;
- аулалық және спорттық клубтарды ұйымдастыру;
- егде жастағы адамдармен әлеуметтік жұмыс.
