Қар, боран және аяз: синоптиктер ауа райы болжамын жариялады

Синоптиктердің болжамынша, алдағы күндері Қазақстанның басым бөлігінде қар, оңтүстік өңірлерде жаңбыр мен қар түрінде жауын-шашын түседі. 6 қаңтарда солтүстік-батыста қатты қар жауады, оңтүстікте жаңбыр мен қар түрінде қатты жауын-шашын күтілуде. 7-8 қаңтар күндері солтүстік-батыста, солтүстікте және орталықта қатты қар жауады.

Сондай-ақ республиканың солтүстік жартысында көктайғақ пен боран болжанып отыр. Республика бойынша тұман түсіп, жел күшейеді.

"Елдің батысында, солтүстік-батысында, солтүстігінде және шығысында солтүстік-батыс антициклон жотасының суық ауа массалары енуіне байланысты температура күрт төмендейді", - деп ескертті синоптиктер.

Батыста және солтүстік-батыста түнгі уақытта 8-25 градус аяз, солтүстікте 5-30 градус аяз, ал республиканың шығысында 5-18 градус аяз күтілуде.

Оңтүстік өңірлерде түнде 5 градус аяз және 7 градус жылы болады.