"Қашықтан жұмыс істеп, сабақты ерте бастау": Депутаттар Алматыдағы кептеліс мәселесін шешуді ұсынды

Фото: Ru.freepik.com
ERNUR.KZ. Мәслихан депутаттары Алматыдағы кепетеліс мәселесін шешу үшін қызметкерлерді онлайнға ауыстырып, студенттердің сабақ уақытын жылжытуды ұсынды, деп жазады Stan.kz.

Депутаттар кептелісті азайту үшін екі ауысымда оқитын студенттердің сабағын 8:00-де емес, сағат 07:30-ға ауыстыру керек де санайды. Ал екінші ауысымдағылардың сабағы 10:00 немесе 11:00-ге басталса деген ұсыныс айтты. Осылайша, көліктер ағыны бірқалыпты бола бастайды.

“Әр таң сайын қала тұрғындары бір мәселеге тап болады: бәрі бір уақытта жолға шығады — ата-аналар балаларын мектепке және балабақшаға апарады, студенттер оқу орындарына асығады, ересектер жұмысқа барады. Нәтижесінде кептеліске, стресске түсіп, уақыты құр кетеді”, – деп жазды Алматы әкімлігі.

Сондай-ақ депутаттар жекеменшік мектептерге автобустарды жалға алуды ұсынды. Яғни, ата-аналар балаларын көліктерімен емес, автобуспен жіберсе, мектептер маңындағы кептелістер азаяды.

Ал банк қызметкерлері, үкіметтік емес ұйымдар, нотариалдық кеңселер мен басқа да жеке компаниялар қызметкерлері үшін депутаттар икемді жұмыс форматын ұсынды. Тым болмаса жартылай қашықтан жұмыс істеуге көшу идеясын алға тартты.

Осылайша, адамдардың жүйкесі мен уақытын үнемдеп қана қоймай, қаладағы ауа мәселесін де шешуге болады дейді депутаттар. Ауа тазарса тұрғындардың денсаулығы да жақсарады деген ойда.

Sergek мәліметтері бойынша, былтыр осы кезеңде негізгі тас жолдардағы көлік ағыны 14–35%-ға артқан, ал қозғалыстың орташа жылдамдығы 25%-ға дейін төмендеген

“Колледждер мен жоғары оқу орындарында сабақ басталу уақытын кейінге шегеру, сондай-ақ мемлекеттік мекемелердің жұмыс кестесін өзгерту таңғы уақытта көлік ағындарын азайтып, дұрыс бөлуге мүмкіндік береді. Бұл өз кезегінде магистраль жолдардың жүктемесін төмендетіп, жалпы қалалық инфрақұрылымның тиімділігін арттырады”, – деді мәслихат депутаты Қарашаш Джузеева Almaty.tv арнасына берген сұхбатында.