Қазақстан мен Қырғызстан арасындағы сауда көлемі 3 млрд долларға дейін жетуі мүмкін

ERNUR.KZ. Премьер-министрдің орынбасары – сыртқы істер министрі Мұрат Нұртілеу Қырғызстанға ресми сапары аясында Қырғыз Республикасының сыртқы істер министрі Жээнбек Кулубаевпен кездесті, деп жазады Azattyq Rýhy.

Кездесу барысында тараптар екіжақты қарым-қатынастардың жоғары қарқынын атап өтті. Министр Мұрат Нұртілеу қазақ-қырғыз қатынастары мемлекет басшыларының саяси ерік-жігерінің арқасында жаңа сапалы деңгейге көтерілгенін айтты.

«Қазақстан бауырлас Қырғызстанмен одақтастықты тереңдетуге берік бейілді», – деді министр.

Сыртқы істер министрлері соңғы жылдары қол жеткізілген уағдаластықтардың орындалуын талқылап, парламентаралық және үкіметаралық байланыстарды нығайтуға дайын екенін білдірді.

Жоғары мемлекетаралық кеңес отырысына дайындық

Қазақстан президенті Қасым-Жомарт Тоқаевтың Қырғызстанға ресми сапарына және Жоғары мемлекетаралық кеңестің жетінші отырысына дайындық мәселелері басты назарда болды.

Министрлер екі ел арасындағы сауда көлемін 3 млрд АҚШ долларына дейін арттыруға уағдаласты. 2024 жылы тауар айналымы 1,7 млрд долларды құрады.

2026 жылы шекарада Индустриялық сауда-логистикалық кешенді іске қосу және бірлескен инвестициялық жобаларды дамыту күн тәртібінде тұр.

Энергетика мен агросаладағы серіктестік мүмкіндіктері

Энергетика, көлік, логистика, су және ауыл шаруашылығы салаларында екі жақ өзара тиімді жобаларды дамытуға мүдделі екенін білдірді.

Кездесуде мәдени-гуманитарлық байланыстарды тереңдету жайы жеке қаралды. 2023 жылы Қырғызстан мәдениетінің күндері сәтті өтті.

2025 жылы:

• Қазақстан киносы күндері
• Қазақ-қырғыз жастар форумы
• Бішкекте «Алтын достық көпірі» ескерткішінің ашылуы жоспарланған.

Министрлер өңірлік және халықаралық мәселелер бойынша «сағаттарын теңестірді». БҰҰ аясындағы ынтымақтастық пен халықаралық бастамаларға өзара қолдау көрсетуге бейілділік білдірілді.