​Қазақстан су мамандарының алғашқы тобы Қытайда оқуын бастады

0
348

Су ресурстары және ирригация министрлігі қытайлық әріптестерімен тиісті келісімге қол жеткізген болатын.


​Қазақстан су мамандарының алғашқы тобы Қытайда оқуын бастады

Фото: Су ресурстары және ирригация министрлігі

ERNUR.KZ. Су ресурстары және ирригация министрлігінің бастамасымен Қазақстан су мамандарының алғашқы тобы Қытайда біліктілік арттыру курсын бастады, деп жазады inform.kz.

Осыған дейін Су ресурстары және ирригация министрлігі қытайлық әріптестерімен тиісті келісімге қол жеткізген болатын. Алғашқы топта 30 маман. Одан әрі 25 адамнан жасақталатын тағы 3 топ Қытайда оқиды.

Министрлік мәліметінше, көрші елдегі екі апталық біліктілікті арттыру курстарынан жалпы саны 105 су маманы өтеді. Айта кету керек, оқу курсын Қытай тарабы өз есебінен ұйымдастырды және іс-шараға мемлекеттік бюджеттен қаражат бөлінген жоқ.
- Министрліктің бастамасымен жүзден астам қазақстандық маман өздерінің білімі мен кәсіби дағдыларын шыңдау мүмкіндігіне ие болды. Қытай су шаруашылығы саласында озық технологияларға ие, сондықтан осы елдің тәжірибесін зерделеу еліміздің су саласын дамытуға көмектеседі. Сонымен қатар біздің министрлік басқа мемлекеттермен де осындай курстарды ұйымдастыру бойынша белсенді келіссөз жүргізіп жатыр. Осыған дейін бірнеше су маманы Франция мен Жапонияда білім алып келді, - деді Су ресурстары және ирригация вице-министрі Нұрлан Алдамжаров.
Еске салсақ, биыл наурыз айында алғаш рет Қазақстан мен Қытайдың су ведомстволары су ресурстары саласында өзара түсіністік пен ынтымақтастық туралы Меморандумға қол қойды.
Құжат су ресурстарын ұтымды және орнықты пайдалану, заманауи технологияларды енгізу, баламалы су көздерін бөлу және игеру, сондай-ақ тәжірибе алмасу және бірлесіп маман даярлау саласында екіжақты ынтымақтастықты нығайтуды көздейді.