Отбасы мүшелерінің барлығы коронавирус жұқтырса, онда олар бір палатаға жатқызылуы мүмкін. Өңірлерде бұл төсек-орын қорына байланысты шешіледі.
ERNUR.KZ. Қазақстанда 425 бала вирус жұқтырды. Бұл туралы денсаулық сақтау вице-министрі Людмила Бюрабекова мәлімдеді, деп жазады sputniknews.kz.
"Бүгінгі таңда елімізде коронавирус жұқтырған 425 бала тіркелді. Барлық бала инфекциялық стационарларға орналастырылады. Бір жасқа дейінгі сәбилер міндетті түрде анасымен жатқызылады", - деді Бюрабекова тікелей эфирде.
Бүтін бір отбасы коронавирус жұқтырса, онда отбасы бір палатаға жатқызылуы мүмкін. Өңірлерде мұндай шешім төсек-орын қорына байланысты шешіледі.
Бюрабекованың айтуынша, қазір стационарлық карантинде 3 мыңнан аса адам жатыр, 6 мың адам үй карантиніне алынған.
Вице-министр үй карантинін бұзғандар әкімшілік жауапқа тартылатынын ескертті.
Соңғы деректерге сүйенсек, республикада барлығы 6751 адам коронавирус індетіне шалдықты. Ең көбі Алматы қаласында – 1872, Нұр-Сұлтанда – 1287, Атырау облысында 769 адам тіркеліп отыр.
Бүгінге дейін 3515 адам дертінен айықты, отыз бес науқас қайтыс болды.
