Еңбек және әлеуметтік қорғау министрлігі әлеуметтік қорғау жүйесін өзгертуге кірісті. Осыған байланысты мемлекеттік қолдау шараларын бөлудің категориялық қағидатынан мұқтаждықтың ашық және объективті өлшемдеріне көшу жүзеге асырылады.
ERNUR.KZ. Бұл тәсілдер тек кірістер мен мүлікті ғана емес, сонымен бірге тәуелді жүктемені де ескереді: нақты қанша отбасы мүшесі жұмыс істейді және қаншасы экономикалық тұрғыда белсенді емес. Жасырын кірістер де анықталады — тұрғын үйді жалға беруден бастап бейресми жұмыспен қамтуға дейін. Бұл туралы ОКҚ алаңында өткен баспасөз конференциясында ҚР еңбек және халықты әлеуметтік қорғау вице-министрі Олжас Анафин мәлімдеді.
«Республикалық бюджеттің барлық кепілдендірілген төлемі сақталатынын жеке атап өтеміз. Зейнетақылар, көп балалы отбасыларға берілетін жәрдемақылар, бала туған кездегі төлемдер, мүгедектігі және асыраушысынан айырылуы бойынша жәрдемақылар толық көлемде төленеді. Бұдан бөлек, олар жыл сайын индекстеледі. Бұл жергілікті бюджеттен қосымша қолдау шаралары туралы. Осылайша, мемлекеттік кепілдіктер өзгеріссіз қалады және жүйенің атаулылығы мен әділдігі артады», – деді Олжас Анафин.
Мәселен, отбасының әл-ауқатын бағалаудың жаңа тәсілдері мұқтаждықтың мынадай нақты өлшемдерін көздейді:
- Азық-түлікке қаражаты жетпей жатқан отбасылардың ерекше қажеттіліктері.
- Қажеттілік – тек тамақтану үшін жеткілікті, бірақ киім сатып алу қиын.
- Салыстырмалы тұрақтылық – тамақ пен киімге жеткілікті қаражат. Алайда ұзақ мерзімді тауарларды сатып алу қиынға соғады.
- Тұрақтылық – тамақтануға, киімге, ұзақ мерзімді тауарларға қаражаттың жеткілікті болуы, бірақ жаңа көлік сатып алу қиынға соғады.
- Әл-ауқат – автокөлік сатып алуға қаражаттың жеткілікті болуы. Қосымша жылжымайтын мүлікті сатып алу қиын.
- Жоғары әл-ауқат – материалдық проблемалардың болмауы. Қосымша жылжымайтын мүлікті сатып алуға қаражаттың жеткілікті болуы.
«Министрлік әлеуметтік көмек көрсету саясатын қайта қарап жатыр, ол үшін категориялық тәсілден бас тартып, яғни қажеттілік критерийлерін енгізу көзделген, яғни нақты мұқтаж азаматтарға көмек көрсету бойынша жұмыс жүргізілуде. Осы тәсілді сынақтан өткізу үшін 11 мемлекеттік қызмет көрсету бойынша пилоттық жоба іске асырылуда. Пилоттық жоба Қарағанды облысында және Шымкентте іске асып жатыр», – деді вице-министр.
Спикердің айтуынша, пилоттық жобаны іске асыру қолданыстағы шаралардың бытыраңқылығы мен қайталануын, тиімсіз төлемдерді қысқартуға, шын мәнінде мұқтаж азаматтарды мемлекеттік қолдау шараларымен қамтамасыз етуге, оларды ұсыну бойынша бизнес-процестің ашықтығын арттыруға мүмкіндік береді.
