​Қазақстанның 5 кәсіпорны Сауд Арабиясына ет экспорттайды

ERNUR.KZ. Қазақстанның ет өңдеу кәсіпорындары Сауд Арабиясына ет экспорттайды, деп жазады ҚазАқпарат.

Қазақстанның Ауыл шаруашылығы министрлігі мен Сауд Арабиясының Азық-түлік өнімдері мен дәрі-дәрмек басқармасы арасындағы екіжақты белсенді ынтымақтастық нәтижесінде қазақстандық 5 ет өңдеу кәсіпорны Сауд Арабиясына қой еті мен сиыр етін экспорттауға құқығы бар кәсіпорындар тізіміне енгізілді.

Олар: «Алтын қазық» ЖШС (Ақмола облысы), «Ақтөбе ет кластері» ЖШС (Ақтөбе облысы), «Empire Food» ЖШС (Алматы облысы), «Meat Processing and Service LLP» ЖШС (Алматы облысы), «Кублей» ЖШС (Батыс Қазақстан облысы). Бұған дейін 2021 жылғы 6-14 қыркүйек аралығында Сауд Арабиясының ветеринария қызметінің мамандары қазақстандық 5 ет өңдеу кәсіпорнына инспекция жүргізген болатын.

«Осылайша, отандық кәсіпкерлер басқа елдердің аумағында қазақстандық мал шаруашылығы өнімдерін өткізудің жаңа нарығын игеруді жалғастырып жатыр» деп мәлімдеді Ауыл шаруашылығы министрлігі.