kolesa.kz
ERNUR.KZ. 2026 жылғы 25 шілдеден бастап Қазақстан мен Біріккен Араб Әмірліктері арасында жүргізуші куәліктерін өзара тану және алмастыру туралы келісім күшіне енеді, - деп жазады Tengri Auto.
Құжат Қазақстан ішкі істер министрі Ержан Сәденовтің БАӘ-ге жұмыс сапары кезінде қол қойылған.
Жаңа келісім екі ел азаматтарына ұлттық жүргізуші куәлігін пайдалануды және алмастыруды едәуір жеңілдетеді.
Енді БАӘ-де уақытша жүрген Қазақстан азаматтары қазақстандық жүргізуші куәлігін сол елдің заңнамасына сай пайдалана алады. Ал тұрақты тұруға көшкен жағдайда "В" санаты бойынша, яғни жеңіл көлік жүргізуге арналған куәлікті және "В1" кіші санатындағы трициклдер мен квадроциклдерге арналған куәлікті теориялық және практикалық емтихан тапсырмай-ақ алмастыра алады.
Дәл осындай тәртіп Қазақстанға көшетін БАӘ азаматтарына да қолданылады.
Жүргізуші куәлігін алмастыру үшін жарамды ұлттық куәлік, қолданыстағы тұруға ықтиярхат, құжаттың ресми аудармасы қажет. БАӘ-де құжат араб тіліне, ал Қазақстанда қазақ немесе орыс тілдеріне аударылуға тиіс. Сондай-ақ, міндетті медициналық тексеруден өту керек.
Бұл ретте ұлттық жүргізуші куәлігі алынбайды. Құжат алмастырылғаннан кейін екі елдің уәкілетті органдары бір-біріне рәсімнің аяқталғаны туралы ғана хабарлайды.
Ішкі істер министрлігінің мәліметінше, жеңілдетілген тәртіп тек "В" санаты мен "В1" кіші санатына қатысты. Өзге санаттағы жүргізуші куәліктері барған елдің заңнамасына сай алмастырылады.
Министрлік шетелде жүрген қазақстандықтарды барған елдің заңдарын қатаң сақтауға, жергілікті дәстүрге, қоғамдық тәртіп нормалары мен мәдениетке құрметпен қарауға шақырды.
