Қыркүйектің соңынан бастап дүкендерде ескі 5000 теңгелік қағаз ақшаны қабылдамайды

ERNUR.KZ. Қыркүйектің соңынан бастап ескі 5000 теңгелік купюраларды қабылдамайды. Қазақстандықтар ескі 5000 теңгелік қағаз ақшаны жаңа банкноттар шыққаннан кейін кез келген уақытта айырбастай алады, деп жазады stan.kz.

Ұлттық банк төрағасы Тимур Сүлейменов алаңдауға себеп жоғын айтты.

“Купюра айналымнан бірден алынып тасталмайды, ол біз жоспарлағандай кезең-кезеңімен айналымнан шығады. Яғни, банктер оларды жеке және заңды тұлғалардан қабылдап, біздің барлық облыстық филиалдардағы қоймаларға өткізеді. Бір немесе екі, үш жылдан кейін болсын, ескі 5000 теңгелік қағаз ақшалары барлар Ұлттық банктің облыстық филиалына келіп, сол номинал бойынша тапсыра алады”, – деді Тимур Сүлейменов Ұлттық банкте өткен брифингте.

Банк ескі банкноттарды қабылдап, орнына жаңасын береді.

2025 жылдың 24 қыркүйегіне дейін 2011 жылғы үлгідегі 5000 теңгелік банкноттар заңды төлем құралы болып қала береді және дүкендер оларды қабылдауға міндетті. Параллель айналым кезеңі аяқталған соң барлық банктер мен “Қазпошта” үш жыл бойы ескі үлгідегі купюраларды жаңаға айырбастайды. Ал Ұлттық банк филиалдары – мерзімсіз қабылдайды.

Айта кетейік, жаңа “сақ стилі” сериясындағы 5000 теңгелік купюралар 2023 жылдың желтоқсанында шығарылып, 2024 жылдың наурызында жаппай айналымға енгізілген еді.