Қызылорда облысында коронавирус жұқтырған жүкті әйел босанды

10.04.2020 09:13

1 142

Толғағы қысқан әйелді қабылдап алған кезекші бригада мүшелері бірден үйдегі карантинге жатқызылды.

Қызылорда облыстық перинаталды орталығында коронавирус анықталған әйел босанды, деп хабарлайды ERNUR.KZ.

Бұл туралы денсаулық сақтау вице-министрі Ләззат Ақтаева Facebook-те жазды.

"8 сәуірде босанатын уақыты жеткен жүкті әйел өткір респираторлық вирусты инфекция белгілерімен провизорлық перзентханаға (оқшауланған ғимарат) түсті. Денсаулығын тексеру барысында оның қызуы 38,1 градусқа дейін көтерілген. COVID-19 вирусына анализ алынды, ауру жұқтырғаны анықталды. Толғағы басталды. Аман-есен босанды", - деді ол.

Нәрестенің салмағы – 2970 грамм, бойы – 51 см.

"Сәбидің жағдайы қанағаттанарлық, COVID-19-қа анализ алынды", - деп мәлімдеді вице-министр.

Ал баланың анасы вирустан емделу үшін инфекциялық стационарға ауыстырылды.

Перинаталды орталықтың кезекші бригадасы кезекшіліктен кейін екі аптаға үй карантиніне алынды.