Қызылорда облысында тұрғынүй саясаты тиімді жүргізіліп жатыр

Мемлекет басшысы Қасым-Жомарт Тоқаев әрбір Жолдауы мен Үндеуінде өңірлердегі тұрғындарды баспамен қамту үшін арнайы жоспар әзірлеуді міндеттеп келе жатыр. Соның нәтижесінде соңғы жылдары тек қана Қызылорда облысында ұлттық жобалар арқылы төрт мыңдай пәтер табысталып, он жеті мыңнан аса азамат ұоныс тойын тойлаған болса, 2024 жылы 2500-ден аса баспана иесін тапқан. Сәйкесінше өткен жылы Ақмешіт өңірінде тұрғын үй құрылысына 34 миллиард теңгеден астам қаржы бағытталыпты. Қызылорда облысында 2023 жылдан бастап 7, 9 және 12 қабаттан тұратын тұрғын үйлер салынған. Соңғы бірнеше айдың өзінде жүздеген азамат баспаналы болды.

Мәселен, өткен жылдың соңындағы «Тәуелсіздік күні» аясында облыс әкімі баспана кезегінде тұрған сексеннен аса азаматқа үй кілтін табыстады. Соның ізін ала өңірдегі мәдениет қызметкерлеріне алғаш рет Қызылорда қаласынан қызметтік пәтер үлестіріліп, 40 баспана берілді.

Ал жыл басында Жаңақорған аауданына іссапармен барған облыс әкімі Нұрлыбек Нәлібаев әлеуметтік тұрғыдан осал топтарға жататын 124 азаматқа пәтер кілтін табыстады.

Арал өңірінде де облыс әкімінің қатысуымен салтанатты іс-шара өткізіліп, әлеуметтік санаттарға жататын жүз елу азамат баспана кілтіне ие болды.

Сонымен қатар, ақпан айында Жалағаш ауданында тұратын әлеуметтік тұрғыдан осал топтағы 110-нан аса адам баспаналы болды.

Бұл бағыттағы жемісті жұмыстар әлі де жалғасын тауып, Әз Наурыз мейрамы қарсаңында Қызылорда қаласында салынған 135 баспана иелеріне табысталды.

Сөз басында Қызылорда облысында мемлекет қазынасынан бөлінген қаржыға 2500-ден аса баспана сатылып алынып, өңірдегі тұрғынүй құрылысы 126 пайыздық өсімді көрсеткенін айтқан едік. Енді 2025 жылы да тұрғындарды пәтермен қамту масатында 300-ге жуық баспана сатып алуға қаражат қаралып отыр. Одан бөлек, облыс әкімдігі тағы 3300-ден аса баспана сатып алу үшін қосымша өтініш берген.

Жалпы, қазіргі уақытта Қызылорда облысыны әлеуметтік және экономикалық тұрғыдан қарқынды дамып келе жатқан аймақтардың бірі. Облыс әкімдігінің ақпаратына сүйенсек, өңірде сауда, инвестиция, ауыл шаруашылығы, құрылыс сынды салаларда бірнеше пайыздық өсім байқалған. Сондай-ақ, өңірдегі мұнай өндірісінің төмендеуіне байланысты өңдеу ісі мен агробизнесті қарқынды дамытуға басымдық беріліп отыр. Осы орайда биыл облыс аумағында 288 миллиард теңгеден астам қаржыға қырыққа жуық жаңа жоба жүзеге асырылып, мыңға тарта жаңа жұмыс орны ашылмақ. 300 шақырымнан аса жол жөнделіп, қызылордалықтар түгел сапалы ауызсумен қамтылғалы тұр. Ал табиғи газбен қамту көрсеткіші сексен пайыздан асып жығылатын болады. Сонымен бірге, абаттандыру, көгалдандыру жұмыстары қарқын алып, түрлі әлеуметтік нысандар бой көтереді деп жоспарланған. Орталықтар көркейіп, ел емін-еркін демалатын қоғамдық орындар құрылып, ескі нысандар жаңғыртылатын болады.

Өңірдегі жұмыс қарқынын күшейтудің тағы бір маңызды себебі бар. Атап айтқанда, жуырда ғана Көкшетау өлкесінде өткен Ұлттық құрылтайда ел президенті Қасым-Жомарт Тоқаев құрылтайдың келесі жиыны дәл осы Қызылорда облысында өтетінін мәлім еткен еді. Себебі, кезінде талай жыл Қазақ хандығының елордасы болған Ақмешіт өңірінің орталығы Қызылорда қаласының құрылғанына биыл бір ғасыр болады.

Б.Мейірханұлы,

ERNUR.KZ