"Майқайыңалтын" компаниясына жаңа басшы тағайындалды

ERNUR.KZ. Павлодар облысында орналасқан "Майқайыңалтын" акционерлік қоғамының жаңа бас директоры болып Даниал Нәбиев тағайындалды, деп жазады inbusiness.kz.

Бұған дейін ол осы кәсіпорында бас директордың бірінші орынбасары қызметін атқарған.

Компанияның жаңа иесі – "Алтыналмас" АҚ басшылығы Даниал Нәбиевтің кандидатурасын мақұлдап, оны ресми түрде тағайындады. Қазақ-Британ университетінің түлегі Нәбиев – басқару саласында тәжірибесі мол маман.

Бүгінде кәсіпорын өндірісті кеңейту мен жаңғыртуға бағытталған бірқатар бастамаларды қолға алып отыр. Компания қатты пайдалы қазбаларды барлау үшін 5 лицензия алып үлгерді. Перспективалы бағыттардың бірі – Баянауылдағы "Алпыс" кен орны.

Бұл жерде геологиялық барлау жұмыстары жүргізілмек. Сонымен қатар, игерілген кен орнынан қалған тарихи қалдықтарды өңдеуге арналған жаңа фабрика салу жоспарда бар.

"Алтыналмас" компаниясы тек өндіріс көлемін ұлғайтумен шектелмей, кәсіпорындағы еңбек жағдайын жақсартуға, әлеуметтік қолдауды күшейтуге де басымдық бермек.