"Нұр-Мұқасан" төңірегіндегі дау: сот үкімі шықты

0
121

Ғалымжан Сүлеймен өзіне қол көтерген Азамат Есеркеновпен қатар, Мұқасан Шахзадаевты да жауапқа тартуды сұраған еді.


фото: AP Photo / Jean-Francois Badias

ERNUR.KZ. "Нұр-Мұқасан" тобының бұрынғы әншісі Мұқасан Шахзадаев пен топтың қазіргі орындаушысы Ғалымжан Сүлеймен арасындағы дауға сот нүкте қойды, деп жазады sputnik.kz.
Ғалымжан Сүлейменді соққыға жықты деп айыпталған Мұқасан Шахзадаевтың әкімшісі Азамат Есеркеновке сот айыппұл салды. Ол 20 айлық есептік көрсеткіш көлемінде, яғни 78 640 теңге айыппұл төлеуге міндеттелді.
Алайда жәбірленуші Ғалымжан Сүлейменнің қорғаушысы судьяға:
"Біз қылмыстық істі прокурорға қайтаруды және Қылмыстық кодекстің 107-бабы бойынша айып тағуды сұраған едік. Неліктен біздің өтінішіміз қанағаттандырылмады? Іс неге прокурорға қайтарылмады?" – деген сұрақ қойды.
Істі қараған судья Бейнегүл Қайсина бұл сұраққа былай деп жауап берді:
"Сот сотталушының, куәлардың және жәбірленушінің жауаптарын, сондай-ақ қылмыстық іс материалдарындағы дәлелдемелерді бағалай отырып, істі прокурорға қайтаруға негіз жоқ деген қорытындыға келді. Сот тек тағылған айып шеңберінде шешім шығарады. Сот айыптаушы орган болып табылмайды және айыптау шегінен шыға алмайды".
Айта кетері, былтыр қарашада өнер иелері арасында жанжал шығып, олардың бірі екіншісін соққыға жыққан болатын.
Алдыңғы сот отырысында жәбірленуші Ғалымжан Сүлеймен өзіне қол көтерген Азамат Есеркеновпен қатар, Мұқасан Шахзадаевты да жауапқа тартуды сұраған еді.