Сонымен қатар ERG өкілінің айтуынша, мұндай жобаларды іске асыру үшін нормативтік базаны қосымша реттеу қажет.
ERNUR.KZ. «Еуразиялық топ» ЖШС (ERG) Энергетика департаментінің директоры Евгений Никитин ОКҚ алаңында өткен баспасөз конференциясында компанияның энергия тиімділігін арттыру жобалары мен қайталама энергетикалық ресурстарды одан әрі пайдалану бойынша ұсыныстары туралы айтып берді.
Оның айтуынша, металлургия саласында технологиялық газдарды да, артық жылуды да қайта пайдаланудың айтарлықтай әлеуеті бар.
«Біз жылу көздерін верификацияладық. Көлемді жұмыс атқарып, барлық активтерді қарап шықтық. Жылу энергиясын өндіру үшін жылуды кәдеге жаратуға бағытталған 53 қызықты бастаманы анықтадық. Әлеуеттің айтарлықтай жоғары екенін көріп отырмыз. Егер температурасы жоғары металлургиялық газдар түріндегі жоғары әлеуетті жылу көздері туралы айтатын болсақ, барлық зауыт бойынша бұл көрсеткіш шамамен 200 гигакалория деп бағаланады», – деді Евгений Никитин.
Сондай-ақ ол перспективалы бағыттардың бірі технологиялық жабдықтарды салқындату контурларында пайда болатын төмен әлеуетті жылуды пайдалану екенін атап өтті. Атап айтқанда, Ақсу ферроқорытпа зауытындағы бір пеш бойынша әлеует 31 МВт-қа дейінгі жылу энергиясын құрайды.
Сонымен қатар ERG өкілінің айтуынша, мұндай жобаларды іске асыру үшін нормативтік базаны қосымша реттеу қажет.
Оның сөзінше, келесі қадам кәсіпорындардан тыс өндірістік жылуды, атап айтқанда, басқа тұтынушыларды жылумен қамтамасыз ету қажеттіліктері үшін пайдалануға жағдай жасау болуы керек.
