Сондай-ақ Энергетика министрлігімен бірлесіп, «Әлеуметтік әмиян» жүйесінде «Тұрмыстық газға ваучерлер беру» жобасы Қазақстанның барлық аумағында ауқымды жүргізілуде.
ERNUR.KZ. Қазақстанда орман өрттерін ерте анықтаудың автоматтандырылған жүйесі енгізілді. 148 камера ең қауіпті және үлкен орман алқабы бар жерлерде орнатылған. Бұл туралы ОКҚ алаңында өткен баспасөз конференциясында ҚР цифрлық даму, инновациялар және аэроғарыш өнеркәсібі вице-министрі Дмитрий Мун мәлімдеді.
«Орман алқаптарындағы барлық өрт сөндіруші орнында қалады, қысқартулар қарастырылмаған, бірақ тәуекелдерді азайту үшін одан әрі тезірек әрекет етуге көмектесетін камералар жеткізілді», — деп нақтылады спикер.
Нәтижесінде бір жыл ішінде орман өрттеріне ден қою уақыты 3 есеге, ормандардың өртену алаңы 20 есеге қысқартылды және сөндіру шығындары 15 есеге азайды.
Сонымен қатар вице-министр эмиссия мен шығарындыларды бақылау бөлігінде экологиялық бағыттағы барлық ақпараттық жүйені біріктіретін платформаның енгізілгенін атап өтті. Осылайша, онлайн режимінде шығарындылар бойынша нақты өлшемдер қолжетімді, бұл елдегі экологиялық жағдай бойынша уақытылы шешім қабылдауға мүмкіндік береді. Сонымен, бүгінгі таңда ірі кәсіпорындардан басқа, бірінші және екінші санаттағы 6134 кәсіпорын бірыңғай жүйеде есеп береді.
Сондай-ақ Энергетика министрлігімен бірлесіп, «Әлеуметтік әмиян» жүйесінде «Тұрмыстық газға ваучерлер беру» жобасы Қазақстанның барлық аумағында ауқымды жүргізілуде. Жүйе азаматтарға жеке шот нөмірін енгізу арқылы «QazaqGazAimaq» жүйесінде жеңілдікті автоматты түрде есептен шығаратын ваучерді іске қосуға мүмкіндік береді.
