Павлодарда бес айлық нәресте ұйықтап жатып көз жұмды

ERNUR.KZ. Павлодар қаласында жас ана сәбиін түнгі ұйқыға жатқызып, бірнеше сағаттан соң оны жансыз күйінде тауып алған. Алдын ала болжам бойынша, сәбидің тұншығып қалуына грек ботқасының қалдықтары себеп болуы мүмкін, деп жазады azattyq-ruhy.kz.

Қайғылы жағдай 1 тамыз күні Павлодардағы №5 қалалық емханада тіркелген. Әйел адам бес айлық нәрестесін блендерден өткізіліп дайындалған грек ботқасымен тамақтандырғаннан кейін ұйықтауға жатқызған. Түнгі сағат 1-де сәбиінің тыныс алмай жатқанын байқап, дереу жедел жәрдем шақырған. Алайда келген дәрігерлер нәрестенің көз жұмғанын растаған.

Асфиксия – нәрестелер арасындағы жиі қауіп

Медицина қызметкерлерінің айтуынша, асфиксия (тұншығу) – нәрестелер арасындағы өлімнің жиі кездесетін себептерінің бірі. Тыныс алу жолдарының бітелуі көбіне тамақ қалдықтары, шырыш, жұмсақ немесе қатты заттар (жастық, көрпе, ойыншықтар) сияқты бөгде элементтерден болады.

Кей жағдайда ананың кеудесі де сәби үшін қауіп төндіруі мүмкін.

Бұған дейін де ұқсас жағдайлар болған

Өткен жылдың тамыз айында Павлодар облысында апта аралығында екі бірдей ұқсас оқиға тіркелген. Екі көпбалалы ана түнгі емізуден кейін сәбилерін бөлек жатқызбай, төсекте бірге қалған. Таңертең сәбиін оятып алмақ болғанда, оның түнде тұншығып көз жұмғанын байқаған.

Дәрігерлердің пікірінше, бұл оқиғаларда аналардың шаршауы мен ұйқысыздығы шешуші рөл ойнаған болуы мүмкін.

Дәрігерлер ата-аналарға кеңес береді

Мамандар ата-аналарға келесі қауіпсіздік шараларын ұстануға кеңес береді:

• Бала тамақтанған соң бірден жатқызбау – алдымен тік ұстап, асқазанынан ауа шығаруға мүмкіндік беру;
• Қатты төсеніш пайдалану, көрпе орнына арнайы жабық конверт қолдану;
• Баланы арқасымен немесе қырымен жатқызу;
• Сәби мойнына тағылатын тізбек, емізік жіптері, алқа, крестик сияқты заттарды пайдаланбау;
• Ең бастысы – бөлек ұйықтау ережесін сақтау.

Медицина қызметкерлері: «Бөлек ұйқы – нәрестенің өмірі мен қауіпсіздігін қамтамасыз ететін маңызды фактор», – деп ескертеді.