Премьер-министр неге BI Group пен BAZIS-А-ға шүйлікті – Серік Жұманғариннің жауабы

05.03.2025 14:26

247

Өткен аптада Премьер-министр кәсіпкерлерді екі аптада салық сомасын әділетті түрде төлеуге шақырған болатын.

Фото: Виктор Федюнин / Kazinform

ERNUR.KZ. Премьер-министрдің орынбасары — Ұлттық экономика министрі Серік Жұманғарин Үкімет басшысы Олжас Бектеновтің салық мәселесіне арналған жиында неге BI Group пен BAZIS-А компанияларына шүйліккенін түсіндірді, деп жазады inform.kz.

"Сіздер камералдық бақылаудың қорытындысы бойынша хабарлама жіберіліп жатқан компаниялардың деңгейін түсінсін деген оймен сіз айтып тұрған компанияларды атау туралы шешім қабылданған болатын. Өйткені ел ішінде ешкім қол тигізе алмайтын компаниялар бар, ал бейшара орта және шағын бизнес бүкіл ауыртпалықты арқалап жатыр деген түсінік қалыптасқан. Сондықтан Премьер-министр Олжас Абайұлы қандай компаниялармен жұмыс істеп жатқанымызды көрсету үшін осыларды атады. Бірден айтайын, қол тигізуге болмайтын компания жоқ. Бәрі салық төлейді", — деді ол Мәжіліс отырысынан кейін БАҚ өкілдерінің сұрағына берген жауабында.

Вице-премьер мұндай тәсіл салық органдарының қалыпты жұмысы екенін атап өтті.

— Бұл жерде әкетіп бара жатқан ештеңе жоқ. Былтыр салық комитеті сіз айтып тұрған сияқты 400 мыңнан астам хабарлама жолдаған болатын. Бұл олардың тұрақты жұмысы. Тек бұл жолы сіздерге соның кейбір тұсын ақтарып көрсеттік. Өйткені шығындарды үнемдеу, қосымша кіріс көздерін іздеу жұмыстарымен ешкім айналысып жатқан жоқ дегенге саятын сын өте көп айтылып кетті. Бұл жолы салық комитетінің кейбір аспектілері ғана сіздерге ашып көрсетілді. Оның ішінде блогерлерге жіберілген хабарламалар да бар. 15 блогер қазірдің өзінде 1,5 млрд теңге табысын қайта көрсетіп, 75 млн теңге салық төлегенін білесіздер. Ал қазіргі ірі компанияларға, құрылыс компанияларына қатысты мәселе салық комитетінің қалай жұмыс істеп жатқанына мысал бола алады. Шын мәнінде ондай хабарламалар өте көп жіберіліп жатыр, — деді Серік Жұманғарин.

Еске салсақ, өткен аптада Премьер-министр кәсіпкерлерді екі аптада салық сомасын әділетті түрде төлеуге шақырған болатын.