Айжан Есмағамбетова адам ағзасында ақуыздар, майлар мен дәрумендер аз болса, иммунитет әлсіреп, инфекция тез жұғуы мүмкін екенін айтты.
ERNUR.KZ. Қазақстанның бас мемлекеттік санитар дәрігері Айжан Есмағамбетова ауыз бекітетін қазақстандықтарға кеңес берді, деп жазады sputniknews.kz.
"Егде жастағы және соматикалық ауруларға шалдыққан адамдар коронавирустың ауыр формасына тап болуы мүмкін. Ағзада ақуыздар, майлар мен дәрумендер аз болса, адамның иммунитеті әлсірейді. Ал иммунитет төмендесе, инфекция тез жұғады және ауру асқынып кетуі мүмкін", - деді Есмағамбетова бүгінгі онлайн брифингте.
Осы орайда ол ораза ұстайтындарға тамақ рационына ұқыпты болу қажеттігін жеткізді. Оның ішінде ақуыздар, көмірсулар мен дәрумендер болуы шарт. Суды көбірек ішіп, көкөніс пен жемістерді жиі жеу керек.
"Биыл коронавирусқа байланысты Рамазан айы басқаша өтеді. Оны бәріңіз жақсы білесіздер. Сондықтан барынша оқшаулану қажет. Көпшілікке ауызашар жасамауға және мешітте жиналмауға кеңес береміз", - деп атап көрсетті Есмағамбетова.
Айта кетейік, биыл қасиетті Рамазан айы 24 сәуірде басталады. Төтенше жағдайға байланысты жұқпалы індеттің алдын алу үшін мешіттерде жұма, тарауық, күнделікті жамағат намаздары уақытша оқылмайды. Сонымен қатар, мешіт пен қоғамдық орындарда ауызашар берілмейтін болды. Ал пітір садақасының мөлшері 370 теңге деп бекітілді. Оны онлайн түрде аударуға болады.
