Талапты жас болашағын компьютерлік ғылым саласымен байланыстырады.
ERNUR.KZ. Талдықорғандық оқушы Гарвард университетінің грантын жеңіп алды. Әлемдегі ең үздік жоғарғы оқу орындарының біріне түсу үшін Сезім Ертанатов тілдік сынақтан жоғары бал жинап, өзі туралы эссе жазған, деп хабарлайды Хабар24.
Назарбаев Зияткерлік мектебінде оқитын талапты жас болашағын компьютерлік ғылым саласымен байланыстырады. Осы бағытта үнемі ізденіс үстінде жүретін жасөспірім қазірдің өзінде сайт ашып әртүрлі бағдарламалармен жұмыс істей алады. Қоғамдық шараларға да белсене араласады. Мәселен, осыған дейін жетімдер үйіндегі балаларға ағылшын тілінен сабақ беріпті. Тамыз айында мұхиттың арғы жағына аттанғалы отырған жас, келешекте отанына оралып тың жобаларды жүзеге асыруды мақсат етіп отыр.
"Болашақта осы салада бітіріп шығып, магистратура оқимын деген жоспарым бар. Әрине технологиялық алып компанияларда жұмыс істеу барлық оқушының арманы мақсаты, өзімді сол компаниялардың белсенді қызметкері ретінде елестетемін. Сол жерде уақытша жұмыс істеп, тәжірбие жинап, Қазақстанға келіп, стартап жобаларды жүзеге асырсам деймін", - дейді Назарбаев зияткерлік мектебінің оқушысы Сезім Ертанатов.
