«Туған күніне сыйлық еді: Аттракционда қайтыс болған келіншектің туысқандары мән-жайды айтты

12.10.2021 09:17

549

Адреналинді жаны сүйген қарағандылық келіншек осыдан бір апта бұрын ғана 33-ке келген.

«Туған күніне жасалған сыйлық еді...». Қарағандыда адреналин қуамын деп, ажал құшқан келіншектің туысқандары мән-жайды баяндап берді, деп хабарлайды ERNUR.KZ Еуразия бірінші арнасына сілтеме жасап.

Қауіпті ермекті жанына серік еткен ол бұған дейін де бірнеше рет биіктіктен секірген екен. Бірақ бұл жолы экстремалды ойынның соңы орны толмас қайғылы жайтқа әкеп соққан.

Қайғылы жайт Қарағандыдағы қонақ үйдің біріндегі шатырға орнатылған аттракционда болған.

"33 жастағы пациент көпбейінді ауруханаға аса ауыр халде жеткізілді. Оның миы шайқалып, травматикалық шок пен миішілік гематома алған. Оған шұғыл түрде ота жасалды", - дейді нейрохирург Ниязбек Ерниязов.

Алайда алған жарақатынан келіншек жансақтау бөлімінде есін жыймастан, көз жұмды. Куәгерлердің сөзінше, жұмысшылардың бірі арқанды бекітіп үлгермеген екен. Қазір істің мән-жайын полиция анықтап жатыр.

"Аталған факті бойынша ҚР ҚК 306 бабы 3 тармағына сәйкес қылмыстық іс қозғалды. Қазіргі уақытта тергеу амалдары жүргізілуде", - дейді Облыстық ПД ресми өкілі Бақытжан Құдияров.

Егер аттракцион басшылығының кінәсі анықталса, күдіктілер 8 жылға дейін бас бостандығынан айырылуы мүмкін. Ал қала әкімдігінің таратқан мәліметіне сәйкес, ұйымдастырушыларға бұл қауіпті аттракционның қызметін жүргізуге ешқандай рұқсат берілмеген екен.

Ал қауіпті ермекті жанына серік еткен келіншек бұған дейін де биіктіктен секірген екен. Бұл жолғысы жақындарының туған күнге жасаған сыйлығы болыпты. Адреналинді жаны сүйген қарағандылық келіншек осыдан бір апта бұрын ғана 33-ке келген еді. Марқұмның артында жұбайы мен 3 баласы қалды.