Бүгінде 3,3 млн адам МӘМС жүйесінен тыс қалып отыр.
фото: Sputnik / Владислав Воднев
ERNUR.KZ. 2026 жылдан бастап тұрмысы төмен азаматтар медициналық сақтандыру жүйесімен қосымша қамтылады. Бұл туралы премьер-министр Олжас Бектенов мәлімдеді, деп жазады sputnik.kz.
Үкіметтің бүгінгі отырысында міндетті әлеуметтік медициналық сақтандыру мәселесі қаралды.
“Біздің басты мақсатымыз – ашық, әділетті және ең бастысы, әрбір азамат үшін қолжетімді денсаулық сақтау жүйесін қалыптастыру. 2026 жылдан бастап тұрмысы төмен азаматтар жергілікті бюджеттер есебінен медициналық сақтандыру жүйесімен қосымша қамтылады. Осындай ауқымды өзгерістерді бірлесіп жүзеге асыруға күш жұмылдыру керек”,— деді Бектенов.
Осы орайда премьер әкімдіктермен бірге медициналық сақтандырудың жаңа тетігін енгізу бойынша үйлесімді жұмысты жүргізуді тапсырды.
Айта кетері, бүгінде 3,3 млн адам МӘМС жүйесінен тыс қалып отыр. Соның ішінде 2,4 млн азаматтың өмір сүру деңгейі орташа және қанағаттанарлық болса, 1 млн азаматтың табысы төмен. Осы санат үшін жарналарды төлеу міндеті жергілікті атқарушы органдарға жүктеледі.
Сондай-ақ, ресми тіркелген жұмыссыздар үшін МӘМС жарналарды әкімдіктер төлейді.
