Оқиға 2025 жылдың жазында Жаңаарқа кентінде адам өліммен аяқталған төбелестен басталған.
ERNUR.KZ. Ұлытау облысында алаяқтық жасауға әрекет етті деп танылған екі полиция қызметкеріне қатысты үкім шығарылды. Айыпталушылар – бұрынғы аудандық полиция бөлімінің тергеу жөніндегі басшысының орынбасары және оның қарамағындағы аға тергеушілері, деп жазады stan.kz.
Оқиға 2025 жылдың жазында Жаңаарқа кентінде адам өліммен аяқталған төбелестен басталған. Қылмыстық істі тергеу барысында куәгерлердің бірі бірнеше рет жауап берген. Сол кезде сот анықтағандай, прокуратура оны қылмыстық жауапкершілікке тартып, тіпті қамауға алуы мүмкін екені айтылған.
Кейін куәгерді жергілікті дүкендердің бірінің жанына кездесуге шақырған. Сонда оны босатып жіберуі үшін 5 миллион теңге талап еткен. Айыптау нұсқасына сәйкес, жоғары лауазымды полицей ер адамға прокурор оған қатысты қылмыстық іс қозғауды талап етіп отырғанын, сондықтан бұл мәселені "жылы жабу" қажет екенін, ал ақша қадағалаушы орган арқылы мәселені шешуге жұмсалатынын айтқан.
Алайда талаптар мұнымен шектелмеген. Сот материалдарына сәйкес,
“Іс бойынша басқа куәгерлерге де ықтимал құқықтық қиындықтардан құтылу үшін әрқайсысынан 1 миллион теңгеден жинау ұсынылған. Қылмыстық қудалаудан қорыққан ер адамдардың бірі бастапқыда келісім берген, бірақ кейіннен Ұлттық қауіпсіздік комитетіне жүгінген”, – делінген сот материалдарында.
Арнайы қызмет өкілдері оған 5 миллион теңге беріп, ақшаны тапсыру сәтін тіркеуге арналған арнайы құрылғылар ұсынған. Сол күні аға тергеуші куәгерге келген. Кездесу барысында ол мәселенің оң шешілетінін не шешілмейтінін сұраған. Жауап ретінде оған қажет процессуалдық шешім шығарылатыны айтылған.
Сот мәліметінше, ақшаны алғаннан кейін тергеуші өз басшысының жанына барған. Содан соң екеуі елді мекеннен шығып, қонақүй маңындағы орман алқабының жанында тоқтаған. Дәл сол жерде оларды Ұлттық қауіпсіздік комитетінің жедел қызметкерлері ұстаған.
Іс материалдарына сәйкес, айыпталушыларды ұстаған кезде екі ер адам алынған ақшаны өзара бөлісіп жатқан.
Сот процесінде полиция бөлім басшысының орынбасары өз кінәсін мойындамай, ақша талап етпегенін, куәгермен кездеспегенін және ақшаның қайдан шыққанын білмегенін айтқан. Ал оның бұрынғы қарамағындағы қызметкер бастапқыда да айыпты жоққа шығарып, тек делдал болғанын мәлімдеген. Алайда дәлелдер зерттелгеннен кейін ол кінәсін толық мойындап, басшысының тапсырмасымен әрекет еткенін айтқан.
Сот екі адамды қызметтік өкілеттігін пайдалана отырып, топ болып алаяқтық жасауға оқталды деп таныды. Екеуіне де 3 жыл 6 ай бас бостандығынан айыру жазасы тағайындалды. Сонымен қатар, олар мемлекеттік қызметте және квазимемлекеттік секторда лауазым атқару құқығынан өмір бойына айырылды. Бұрынғы бөлім басшысының полиция майоры арнайы атағы да алынды.
Сот үкімі әлі заңды күшіне енген жоқ, сотталушылар апелляциялық шағым түсірген.
