Вайнерлер Төребаев пен Шерниязовқа Instagram-ды пайдалануға рұқсат етілген бе?

04.12.2024 16:49

160

Қазіргі уақытта Мейіржан Төребаевтың Instagram-парақшасында 3,2 миллион жазылушы, ал Мейірхан Шернияязовтың 915 мың жазылушы бар.

Әлеуметтік желіден алынған сурет

ERNUR.KZ. Қазақстан Республикасы Ішкі істер министрлігінің Қылмыстық-атқару жүйесі комитеті (ҚАЖК) вайнерлер Мейіржан Төребаев пен Мейірхан Шернияязовтың колонияда смартфон мен әлеуметтік желілерді пайдаланып, контент жариялауына рұқсат етілген-етілмегеніне жауап берді, деп жазады tengrinews.kz.

Айта кетейік, Төребаев пен Шернияязовтың Instagram әлеуметтік желісіндегі парақшалары белсенді, стористер мен жазбаларында үнемі әзіл-оспақ контент жарияланып, пікірлерге лайктар қойылып отырады.

ҚАЖК сот үкіміне сәйкес, аталған сотталғандар жазасын минималды қауіпсіздік мекемесінде өтеп жатқанын еске салды.

"Оларға мекеме аумағынан тыс жерде тек қоңырау шалу/жауап беру/SMS функциялары бар мобильді телефонды (смартфон емес) пайдалануға рұқсат етілген. Әлеуметтік желі парақшаларын жүргізуге қатысты бұл азаматтармен әңгіме жүргізілді, олар әлеуметтік желідегі парақшаларын жұбайлары мен әкімшілері жүргізетінін түсіндірді", - деп хабарлады ҚАЖК Tengrinews.kz-тің ресми сауалына берген жауабында.

Сондай-ақ, ҚАЖК минималды қауіпсіздік мекемелерінде ұсталып отырған сотталғандарға мекеме аумағына мобильді байланыс құралдарын, компьютерлік жабдықтарды алып кіруге, сақтауға және пайдалануға, сондай-ақ мекеме аумағынан өз бетінше кетуге тыйым салынғанын атап өтті.