Дұрыс таңдалмаған фильм көңіл-күйді бұзып, ұрысқа себеп болуы мүмкін.
фото: ЖИ
Күндізгі қарбаластан кейін үйдегі кешті жұбайыңызбен әдемі өткізгіңіз келсе, бірге кино көру – ұтымды нұсқа. Брақ бұл тұста көңіл-күйіңізге дөп түсетін фильмді таңдау маңызды. Кейде нашар фильм көңіл-күйді бұзып, ұйқыға көңілсіз жатуға тура келеді. Ал дұрыс таңдалған жақсы киноның әсері жүрекжарды әңгімемен бірдей болуы мүмкін.
Ал жұптар үшін махаббат туралы фильм – жақындық пен жылылықты, бір-біріне назар аударып, сезімін білдіру қажеттілігін еске салудың таптырмас тәсілі.
Романтикалық киноның бір жақсысы, ол эмоциялар үшін қауіпсіз кеңістік сыйлайды. Бірге күлуге, кейіпкерлерден өздеріңізді тануға, содан кейін барып жеке тақырыптарға ақырын көшуге болады. Көбіне дәл осындай кештерден кейін жұптар өз қалаулары, қиялдары, шаршағаны немесе қамқорлық туралы ашық сөйлесе бастайды.
Романтикалық кешке махаббат туралы фильмдердің бәрі бірдей сәйкес келе бермейді. Егер күн ауыр өтсе, жарық әрі жеңіл дүниені таңдаңыз. Ойланғыңыз келсе, күрделірек драмалар жарайды. Ал басты мақсат арадағы ұшқынды тұтандыру болса, шиеленіске, сырлы көзқарастар мен жұмбақ сезімдерге толы фильм көріңіздер.
"Ла-Ла Ленд" (La La Land)
Бояу, музыка, арман және тартылыс күші. Эстетика мен жеңіл мұңды жақсы көретіндер үшін тамаша таңдау.
"Жаздың 500 күні" (500 Days of Summer)
Бұл үйреншікті ертегі емес, біздің махаббатты қалай ойдан шығаратынымыз туралы шынайы әңгіме. Күтілімдер мен үміттерді талқылағысы келетіндер үшін өте қолайлы.
"Естелік дәптері" (The Notebook)
«Жылдар бойы қайталап көруден жалықпайтын махаббат туралы ең үздік туынды» деп сипатталатын картиналардың бірі. Өте сезімтал, жылы әрі естен кетпес фильм.
"Титаник" (Titanic)
Иә, бұл өте белгілі нұсқа. Бірақ үлкен эмоцияны, әдемі трагедияны және кинодан кейінгі ұзақ әңгімелерді қаласаңыз, бұл әлі де ұлы махаббат туралы ең жақсы фильм болып қала береді.
"Мөлдір сананың мәңгілік жарқырауы" (Eternal Sunshine of the Spotless Mind)
Ерекше, терең және шынайы дүниелерді ұнататындар үшін. Картина естелікке, ауырсыну мен тартылыс күшіне басқа қырынан қарауға көмектеседі.
"Таң атқанша" (Before Sunrise)
Фильмнің бүкіл желісі дерлік — екі кейіпкердің диалогы. Бірақ сиқыры да дәл осында. Абсолютті жақындық атмосферасын сезіну үшін екеулеп көруге тұратын үздік туындылардың бірі.
"Бруклин" (Brooklyn)
Есейіп өсу, таңдау жасау, сағыныш пен жаңа махаббат туралы нәзік кино. Сезім тұрғысынан өте «әйелдік» фильм.
"Өмір ғажап" (Life is Beautiful / La vita è bella)
Мұнда махаббат адамды ең қорқынышты жағдайларда да аман алып қалатын үлкен күш ретінде көрсетіледі.
"Жел өтіндегі тағдырлар" (Gone with the Wind)
Құштарлық, өршіл амбициялар, жоғалтулар мен ірі мінездер. Егер қуатты классиканы қаласаңыз — іздегеніңіз осы.
"Римдегі каникул" (Roman Holiday)
Жеңіл, әуелеген, ертегі сияқты фильм. Оны түн ортасында тамашалау өте әдемі әсер қалдырады.
"Амели" (Amélie)
Классикалық мелодрама емес, бірақ көңіл-күйді көтеріп, өмірдің ұсақ-түйектерінен ләззат алуды үйрететін кино.
Романтикалық кино көрудің маңызы
Жақсы махаббат киносының бір мықты тұсы бар: ол бізді сезімталдыққа қайта оралтады. Ондағы нәзіктік, тартылыс, таңдау мен сенім туралы оқиғалар ауыр күннен кейін іштей тынышталуға мүмкіндік береді. Көзқарасқа, жанасуға және асықпай сөйлесуге уақыт табылады.
Кино сонымен қатар қарым-қатынастан не күтетінімізді қалыптастырады. Шынайы өмірде сізге не жетіспейтінін түсіну үшін кейде экранға қарау пайдалы: жеңілдік, назар аудару, флирт, қамқорлық, тәуекел немесе жай ғана бірге өткізген әдемі уақыт.
Тағы бір ескеру керек нәрсе – үзіліспен көру. Егер бір сахнадағы жағдайды талқылағыңыз келсе, өміріңіздегі ұқсас сәтті еске түсіргіңіз келсе немесе жай ғана құшақтасқыңыз келсе, киноны тоқтата тұрғанның айыбы жоқ. Мұндай кино көру мұқияттылықты тексеретін емтихан болмауы керек. Өз сезімдеріңіз бен қалауларыңызды басты назарда ұстаңыз.
Романтикалық фильм – эмоционалды көпір. Ол адамға өз сезімдерімен, қалауларымен және қалай сүйіп, сүйікті болғысы келетіні туралы естеліктерімен жұмсақ байланыс орнатуға көмектеседі. Жұптар мұндай киноны бірге көргенде, араларында ашықтық пайда болады. Не ұнайтынын, не толқытатынын, не қоздыратынын, ал не, керісінше, алыстататынын айту оңайырақ болады.
Кино көріп болғаннан кейін әркім өз шаруасымен кетпей, сәл де болса бірге отырған пайдалы. Не әсер еткенін, қай сахна ең әдемі көрінгенін, қай сәттің сіздерде болғанын қаламайсыз немесе қай нәрсені өз өміріңізге енгізгіңіз келер еді – бәрін айтып, талқылаңыздар. Осылайша, кино жай ғана фон болудан қалып, шынайы жақындасу құралына айналады.
Төре СЕЙІТХАН,
ОҚИ ОТЫРЫҢЫЗ:
