Қай елде ОҚУШЫЛАР ҮЙ ТАПСЫРМАСЫН ОРЫНДАМАЙДЫ

сурет: finland-school сайтынан алынды

Финляндия — білім беру саласында әлемдік көшбасшы елдердің бірі. Оның мектептері халықаралық PISA рейтингісінде алғашқы орында. Мұндағы жүйе тек білім берумен шектелмей, оқушылардың жан-жақты дамуына басымдық береді. Финляндияда балаға қысым көрсету емес, оның қызығушылығын ояту маңызды. Сондықтан бұл елдің білім беру жүйесі ерекше. Ал оқушылары мүлде бөлек жүйеде білім алады. Бұл елде оқушыларға үй тапсырмасы берілмейді, баға қойылмайды, ал сабақ уақыты өте қысқа. Финляндиядағы білім беру жүйесі оқушылардың бақытты әрі еркін болуына бағытталған. Қызық па? Ендеше, бірге зерттейік!

БАҒА ҚОЙЫЛМАЙДЫ, ДЕМЕК, ҚАТЕЛЕСУ ҚОРҚЫНЫШЫ ЖОҚ

Фин оқушылары бастауыш сыныптарда баға алмайды. Қателессе, оны сәтсіздік деп емес, үйрену мүмкіндігі деп қабылдайды. Мысалы, егер бала дұрыс жауап бере алмаса, мұғалім онымен жеке сөйлесіп, түсіндірудің жаңа әдісін іздейді. Әңгіме барысында бала өз қателігін анықтап, дұрыс шешімді табуды үйренеді. Бұл балалардың білімге деген қызығушылығын сақтайды және стресстен қорғайды.

ҮЙ ТАПСЫРМАСЫНЫҢ ЖОҚТЫҒЫ — ЕРКІНДІК!

Финляндия мектептерінде оқушыларды үй тапсырмасымен қинамайды. Иә, бұл шындық!

Мұғалімдер сабақ барысында барлық қажетті білімді меңгертуге жағдай жасайды. Мысалы, математика сабағында балалар топтық ойындар арқылы есеп шығарып, жаңа тақырыпты бірге талқылайды. Ал сабақтан кейін оқушылар уақытын хоббиімен немесе табиғат аясында серуендеумен өткізеді. Бұл олардың шығармашылық қабілеттерін дамытуға мүмкіндік береді.

МҰҒАЛІМ — БАСТЫ КЕЙІПКЕР

Финляндияда мұғалімдер ең беделді мамандықтардың бірі саналады. Олар тек жоғары білімді ғана емес, балалармен жұмыс істеуде ерекше шеберлікке ие болулары керек. Ол үшін мұғалімдер магистр дәрежесінде болуы және түрлі курстардан өтуі міндетті саналады. Мұғалімдер оқушылардың қызығушылығын оятып, оларды өз бетімен ізденуге ынталандыруы керек.

БАҚЫТТЫ БАЛАЛЫҚ ШАҚ — БАСТЫ МАҚСАТ

Финляндияның білім беру жүйесінің басты мақсаты — оқушыны тек білімді етіп қана қоймай, бақытты ету. Олар үшін бала ең алдымен — адам. Мысалы, мектептерде жиі ұйымдастырылатын шығармашылық фестивальдер мен әлеуметтік жобалар балаларды ынтымақтастыққа және өмірге дайын болуға үйретеді. Мұндай шаралар оқушылардың өз-өзіне деген сенімділігін арттырады. Және бақытты, стрессіз бала ғана оқуды тез қабылдайды деген ұстанымды ұстанады.

САБАҚ УАҚЫТЫ ҚЫСҚА — БІРАҚ ТИІМДІ

Фин мектептерінде оқушылар күні бойы партада отырмайды. Сабақтар қысқа, бірақ мазмұнды өтеді. Мысалы, тіл үйрену сабақтарында оқушылар кітап оқу немесе әңгімелер жазумен ғана шектелмейді, олар драмалық қойылымдар жасап, рөлдік ойындар ойнайды. Ал дене шынықтыру сабағында таза ауада қозғалмалы ойындар ойнап, денсаулығын жақсартады. Бұл тәсіл балалардың білімді оңай қабылдауына көмектеседі.

Финляндияның білім беру жүйесі үй тапсырмасын ұнатпайтын оқушылар үшін нағыз жұмақ дерсің! Мұнда білім беру балаға қысым көрсетпей, керісінше оның қызығушылығы мен қабілеттерін ашуға бағытталған. Егер сен де мектеп өмірінің жеңіл әрі қызықты болғанын қаласаң, Финляндия тәжірибесінен шабыт алуға болады.